قىزىلوردالىق پوليتسەيلەر ارنايى وپەراتسيا كەزىندە ەسىرتكى پريتونىن انىقتادى, دەپ حابارلايدى Egemen.kz Polisia.kz-كە سىلتەمە جاساپ.
قىزىلوردا پد ەسىرتكى قىلمىسىنا قارسى ءىس قيمىس باسقارماسىنىڭ قىزمەتكەرلەرىمەن جاسىرىن تەرگەۋ ارەكەتتەرىن جۇرگىزۋ بارىسىندا 68 جاستاعى قىزىلوردالىق ءوزىنىڭ تۇرعىلىقتى مەكەنجايىندا ءۇش سىبايلاسىمەن بىرگە ەسىرتكى زاتىن قايناتۋ ارقىلى «ەكستراتسيالىق اپيىندى» دايىنداپ, تامىر ارقىلى ەگىپ, تۇتىنۋ ءۇشىن پريتون ۇيىمداستىرۋ ۇستىندە ۇستالدى. تەكسەرۋ كەزىندە ايعاقتى زاتتار – ەسىرتكى زاتى قايناتىلعان ىدىس-اياقتار, شپريتستەر زاتتاي دالەلدەمە رەتىندە الىندى.
ۇستالعان كۇدىكتى ءوز كىناسىن تولىق مويىندادى. اتالعان دەرەك بويىنشا قازاقستان رەسپۋبليكاسى قىلمىستىق كودەكسىنىڭ 302-بابىنىڭ 1-بولىگىمەن (ەسىرتكى, پسيحوتروپتىق زاتتاردى, سول تەكتەستەردى تۇتىنۋ ءۇشiن پريتوندار ۇيىمداستىرۋ نەمەسە ولاردى ۇستاۋ, سول سياقتى وسى ماقساتتار ءۇشiن ءۇي-جايلار بەرۋ) سوتقا دەيىنگى تەرگەپ-تەكسەرۋ ارەكەتتەرى جۇرگىزىلۋدە.
كۇدىكتىگە قاتىستى «كۇزەتپەن ۇستاۋ» تۇرىندەگى بۇلتارتپاۋ شاراسى تاڭدالدى جانە ول ۋاقىتشا ۇستاۋ يزولياتورىنا قامالدى.