27 قازانداعى جاعداي بويىنشا حالىقتى ساناقپەن قامتۋ كورسەتكىشى 18 111 266 ادامعا نەمەسە 95,2%-كە جەتتى, دەپ جازادى Egemen.kz ۇلتتىق ستاتيستيكا بيۋروسىنا سىلتەمە جاساپ.
قامتۋ كورسەتكىشى بويىنشا الماتى قالاسى كوش باسىندا – 108,2%. ياعني, 1 تامىزداعى جاعداي بويىنشا مەگاپوليستە تۇراقتى تۇراتىنداردىڭ سانى 2 005 496 ادامدى قۇراعان. ونلاين ساناق پەن ينتەرۆيۋەرلەر جۇرگىزگەن ساۋالنامانىڭ ارالىق ناتيجەلەرى قازىرگى ۋاقىتتا قالادا 2 170 715 رەسپوندەنت بار ەكەنىن كورسەتتى. ساۋال سالۋ جۇمىستارى ءالى دە جالعاسۋدا.
وسىعان ۇقساس جاعداي جامبىل (101,5%), الماتى (101,4%), تۇركىستان (100,7%) وبلىستارى مەن شىمكەنت (100,6%) قالاسىندا قالىپتاستى. بۇل وڭىرلەردە دە ساناق جۇمىستارى اياقتالعان جوق. ەستەرىڭىزگە سالا كەتەيىك, شارا اياسىندا ەلىمىزدە تۇراقتى تۇرىپ جاتقانداردان وزگە 12 ايدان اسا ۋاقىتقا شەتەلگە ىسساپارمەن شىققاندار (شەتەلدەگى ديپلوماتيالىق كورپۋس پەن قر وكىلدىگىنىڭ قىزمەتكەرلەرى مەن ولاردىڭ وتباسى مۇشەلەرى), كەلىسىمشارت نەگىزىندە ءبىر جىلدان كەم ۋاقىتقا باسقا ەلگە كەتكەن وتانداستارىمىز, وزگە مەملەكەتتە «بولاشاق» باعدارلاماسى اياسىندا ءبىلىم الىپ جاتقان ستۋدەنتتەر, ۋاقىتشا شەتەلگە شىققان تۋريستەر, ۋاقىتشا (12 ايدان از) ەلىمىزدە جۇرگەن شەتەلدىكتەر, ازاماتتىعى جوق ادامدار مەن بوسقىندار ساناقتان وتۋدە.
حالىق ساناعىن وتكىزۋ ادىستەمەسىنە سايكەس, ساۋالناما اياقتالعان سوڭ ناقتى جانە تۇرعىلىقتى حالىق سانى بويىنشا اقپارات الىناتىن بولادى. بۇل ساناتتار نەنى بىلدىرەدى؟ «ناقتى حالىق» دەگەنىمىز, ساناق وتكىزۋ كەزىندەگى بەلگىلى ءبىر ەلدى مەكەندەگى ادامداردىڭ سانىن بىلدىرەدى. بۇل ساناتقا تۇرعىلىقتى تۇرعىندارمەن قاتار, ۋاقىتشا كەلگەندەر مەن رەزيدەنت ەمەس تۇلعالار جاتقىزىلادى. ياعني, مۇندا ەلدى مەكەنگە قوناققا, دەمالۋعا, جۇمىس بابىمەن جانە ت. ب. ماقساتتا, سونداي-اق, ەلدە ۋاقىتشا جۇرگەن شەتەلدىكتەر, ازاماتتىعى جوق ادامدار مەن بوسقىندار قامتىلادى. «تۇرعىلىقتى حالىق» دەگەن ساناتتا ەلدى مەكەندە تۇراقتى تۇرىپ جۇرگەندەرمەن قاتار, ۋاقىتشا باسقا جاققا شىعىپ كەتكەن ازاماتتار قامتىلادى. ولاردىڭ قاتارىنا باسقا ەلدى مەكەنگە نەمەسە شەتەلگە تۋىستارىنا, ەڭبەك دەمالىسىنا, جۇمىس بابىمەن نەمەسە باسقا دا سەبەپتەرمەن ۋاقىتشا كەتكەندەر كىرەدى.
2021 جىلعى ۇلتتىق ساناقتىڭ نەگىزگى كەزەڭى قازاقستاندا 1 قىركۇيەكتەن 30 قازانعا دەيىن وتۋدە. قاراشانىڭ 8-نە دەيىن ساناق وتكىزۋ ادىستەمەسىنە سايكەس, ناقتىلاۋ شارالارى قاراستىرىلعان. 2021 جىلعى حالىق ساناعىنىڭ ۇرانى – «قازاقستاندا اركىم ماڭىزدى! ۆ كازاحستانە كاجدىي ۆاجەن!»