ەل تاۋەلسىزدىگىنە 30 جىل تولۋىنا وراي, تۇركىستان وبلىسى قوعامدىق دامۋ باسقارماسىنا قاراستى «جاستار رەسۋرستىق ورتالىعى» كمم ۇيىمداستىرۋىمەن وبلىس اكىمىنىڭ كۋبوگى ءۇشىن «تۇركىستان – كوشباسشىلار الاڭى» اتتى رەسپۋبليكالىق پىكىرسايىس ءتۋرنيرى ءوتتى.
تۋرنير شىمىلدىعىن اشقان وبلىستىق قوعامدىق دامۋ باسقارماسىنىڭ باسشىسى اڭسار وسەرباەۆ جاستاردىڭ بىرلىك, ىنتىماعىن نىعايتۋعا باعىتتالعان ءىس-شارانىڭ تابىستى بولارىنا سەنىم ءبىلدىرىپ, جاستارعا ساتتىلىك تىلەدى. ەكى كۇنگە سوزىلعان تۋرنيرگە الماتى, باتىس قازاقستان, شىعىس قازاقستان, تۇركىستان, جامبىل وبلىستارىنان جانە نۇر-سۇلتان, الماتى, شىمكەنت قالالارىنان 19 جوعارى وقۋ ورنى مەن ورتا ارناۋلى وقۋ ورىندارىنان 64 ستۋدەنت قاتىستى. ويىندار امەريكالىق – پارلامەنتتىك جانە لينكولن–دۋگلاس فورماتتارىندا ءوتتى. تارتىستى وتكەن ءسوز جارىسى قورىتىندىسى بويىنشا «مۇحتار ماعاۋين» فراكتسياسى مەن اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ (الماتى) اتىنان شىققان وركەن مۇحامەتالي ۇلى, ايىم نۇرساپا جەڭىمپاز اتانسا, «قوجا احمەت ياساۋي» فراكتسياسى مەن م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ (شىمكەنت) ستۋدەنتتەرى اقان بەسباەۆ, ەراسىل انارحان ۇلى ءىى ورىندى يەلەندى. «قۇدايبەرگەن جۇبانوۆ» فراكتسياسى مەن ق.جۇبانوۆ اتىنداعى اقتوبە وڭىرلىك ۋنيۆەرسيتەتىنىڭ ستۋدەنتتەرى ءبىتىمباي يسلامبەك, تولقىن شاميتوۆا ءىىى ورىن الدى. سونىمەن قاتار پىكىرسايىس دوداسىنا قاتىسۋشىلار مەن بەلسەندى ۇيىمداستىرۋشىلار دا «ۇزدىك گيد», «ۇزدىك دەلەگاتسيا», «جاس تالپىنىس», «ۇزدىك پوست», «ۇزدىك تورەشى», «ۇزدىك سپيكەر», «ۇزدىك تالپىنىس» اتالىمدارىمەن ماراپاتتالدى.
تۋرنير بارىسىندا قاتىسۋشىلار ءۇشىن تۇركىستان قالاسىنا ساياحات ۇيىمداستىرىلدى. سونداي-اق جاس پىكىرسايىسشىلار ايماقتى كوگالداندىرۋعا باعىتتالعان «گۇلدەنگەن تۇركىستان» ەكو-اكتسياسىنا ۇلەس قوسىپ, جەڭىس ساياباعىنا تال ەكتى.