تۇركىستان وبلىسى تولە بي اۋدانىندا حالىقارالىق دەڭگەيدە تانىلعان سۋرەتشىلەر كوپ. ەل تاۋەلسىزدىگىنىڭ 30 جىلدىق مەرەكەسى اياسىندا اققۇم اۋىلىندا «سۋرەتشىلەر ءۇيى» اشىلدى. ونەر ورتالىعىنىڭ اشىلۋىنا وسى ولكەنىڭ تۋماسى, قازاقستان سۋرەتشىلەر وداعىنىڭ مۇشەسى قۇتتىبەك جاقىپوۆ مۇرىندىق بولدى.
«سۋرەتشىلەر ءۇيىنىڭ» اشىلۋ سالتاناتىنا اۋدان اكىمى تولەگەن تەلعاراەۆ, اۋداننىڭ قۇرمەتتى ازاماتى, مادەنيەت جاناشىرى كۇليا ايداربەكوۆا, سۋرەتشىلەر وداعىنىڭ توراعاسى ومىربەك جۇبانيازوۆ قاتىسىپ, جينالعان قاۋىمعا جۇرەكجاردى تىلەكتەرىن جەتكىزدى. سونداي-اق مادەنيەت ۇيىندە ەلىمىزدىڭ وڭىرلەرىنەن جانە شەتەلدەردەن كەلگەن ونەر يەلەرىنە قۇتتىبەك تىنىبەك ۇلىنىڭ تۋىندىلارى تانىستىرىلىپ, ونەر يەسىنىڭ «تولەبي – ۇلى دالا مەكەنىم» اتتى شىعارماشىلىق كەشى ءوتتى. «ۇلتىمىزدىڭ تاريحىن, سالت-ءداستۇر, ادەت-عۇرىپ, تۇرمىس تىرشىلىگىن بەينەلى ءارى كوركەم تۇسىندىرەتىن حالىقارالىق دەڭگەيدە ۇيىمداستىرىلىپ جاتقان «تولەبي – ۇلى دالا مەكەنىم» اتتى سۋرەتشىلەر پلەنەرىنە كورشىلەس وزبەكستان, قىرعىزستان مەملەكەتى مەن نۇر-سۇلتان, الماتى قالالارىنان حالىقارالىق دارەجەدەگى سۋرەت شەبەرلەرى كەلىپ وتىر. پلەنەرمەن بىرگە جاس سۋرەتشىلەردىڭ شىعارماشىلىعىنا سەرپىن بەرەتىن وبلىستىق ء«بىر ولكە – ءبىر سۋرەت!» اتتى جاس سۋرەتشىلەر سيمپوزيۋمىنىڭ ءوتۋى دە كوپ جايتتى اڭعارتادى», دەيدى اۋدان باسشىسى تولەگەن تۇرتاي ۇلى.