بارلىق سالادا ءوسىم بار

مامانداردى دايارلاۋ, سەرۆيستىك قىزمەت كورسەتۋ ساپاسىن جاقسارتۋ ماقساتىندا تۇركىستان قالاسىندا اشىلعان حالىقارالىق تۋريزم جانە مەيماندوستىق ۋنيۆەرسيتەتىندە 2 مىڭعا جۋىق جاس ءبىلىم الۋدا. ۋنيۆەرسيتەت ستۋدەنتتەرى حالىقارالىق ۇلگىدەگى ەكى ديپلوم الادى. بۇل ولارعا ءوز ماماندىعى بويىنشا الەمنىڭ كەز كەلگەن نۇكتەسىندە كەدەرگىسىز جۇمىس ىستەۋگە مۇمكىندىك بە­رە­دى. بۇگىندە وڭىرگە كەلەتىن قوناقتار, تۋريستەرمەن جۇمىس جۇرگىزەتىن گيد-ەكسكۋرسوۆودتاردىڭ بىلىكتى كادرلار سانىن ۇلعايتۋ ءۇشىن 50 مامان دايارلاندى. تاۋ-شاڭعى ءتۋريزمىن دامىتۋ ماقساتىندا تولە بي اۋدانىندا «قاسقاسۋ تۋريستىك-رەكرەاتسيالىق ورتالىعى» سالىنادى. قازىرگى تاڭدا ينجەنەرلىك ينفراقۇرىلىم قۇرىلىسى جۇرگىزىلۋدە. وبلىس اۋماعىندا 1 663 تاريح جانە مادەني ەسكەرتكىشتەر ورنالاسقان. جالپى, تۋريزم سالاسى عانا ەمەس, سوڭعى ءۇش جىلدا تۇركىستاندا 445 ملرد تەڭگەگە جاڭا 257 نىساننىڭ قۇرىلىسى جۇرگىزىلدى, ونىڭ 230 ملرد تەڭگەسى جەكە ينۆەستيتسيالار ەسەبىنەن. ال 123 نىساننىڭ قۇرىلىسى اياقتالعان. وبلىستا ساۋدا, اۋىل شارۋاشىلىعى, قۇرىلىس, ينۆەستيتسيا, شاعىن جانە ورتا بيزنەس سالالارىندا ءوسىم بار. وڭىرلىك جالپى ءونىمنىڭ كورسەتكىشى بويىنشا وبلىس رەسپۋبليكادا ەكىنشى ورىندا.

مەملەكەت باسشىسى قاسىم-جومارت توقاەۆقا ءوڭىردىڭ الەۋمەتتىك-ەكونو­مي­كا­لىق دامۋىنىڭ بيىلعى 9 ايداعى قورىتىندىلارى تۋرالى بايانداعان وبلىس اكىمى ومىرزاق شوكەەۆ وسىنداي دەرەكتەر كەلتىردى. پرەزيدەنت وبلىستا اتقارىلىپ جاتقان جۇمىستارعا وڭ باعا بەردى. وبلىس اكىمى وزىنە جۇكتەلگەن فۋنكتسيالار مەن مىندەتتەرىن ورىنداۋى تۋرالى جەتىنشى شاقىرىلىمداعى وبلىستىق ءماسليحات دەپۋتاتتارىنىڭ جانە قوعامدىق كەڭەس الدىندا دا ەسەپ بەرگەن بولاتىن. كوپ­شىلىك ەسەپ بەرۋدەگى بۇل ەرەكشەلىكتى بىر­لىك پەن ءبىر ماقساتتا ورتاق ءتىل تابىسا جۇمىس ىستەۋدىڭ ناتيجەسىنە بالاپ وتىر. وبلىس اكىمى ءوز ەسەبىندە اتقارىلعان ىستەرمەن قاتار ماڭىزدى جوسپارلارمەن دە ءبولىستى.

ء«ۇش جىلدا جالپى وڭىرلىك ءونىم كولەمى 41%-عا ارتىپ, 2,4 ترلن تەڭگەگە جەتتى. ونەركاسىپ ءونىم كولەمى 18%-عا, اۋىل شارۋاشىلىعى 34%-عا, ينۆەستيتسيا 2,4 ەسەگە ارتتى. 735,5 مىڭ شارشى مەتر تۇرعىن ءۇي پايدالانۋعا تاپسىرىلىپ, ءوسىم 90% بولدى. وبلىستىق بيۋدجەتتىڭ كولەمى 2 ەسە ۇلعايىپ, 1,1 ترلن تەڭگەنى قۇرادى. كوروناۆيرۋس ىندەتىنە بايلانىستى شەكتەۋلەرگە قاراماستان بيىلعى  8 ايىندا وبلىستىڭ نەگىزگى الەۋمەتتىك-ەكونوميكالىق دامۋ كورسەتكىشتەرىنىڭ وڭ ءوسىمى ساقتالدى. جالپى, وڭىرلىك ءونىم كولەمى 552,1 ملرد تەڭگەنى نەمەسە وتكەن جىلدىڭ ءتيىستى كەزەڭىمەن سالىستىرعاندا ءوسىم 103,9%-دى قۇرادى. جىل قورىتىندىسىمەن 2,6 ترلن تەڭگەگە جەتكىزۋ جوسپارلانۋدا», دەدى وبلىس اكىمى.

سونداي-اق بيىلعى 8 ايدا وڭدەۋ ونەركاسىبىندە 187,7 ملرد تەڭگە ءونىم ءوندىرىلىپ, توقىما بۇيىمدارىنىڭ ءوندىرىسى – 2,5 ەسەگە, سۋسىندار ءوندىرۋ – 34,8%, قاعاز بۇيىمدارىنىڭ ءوندىرىسى – 32,6%, تاماق ونىمدەرى 5,8% وسكەن. ەڭبەك ونىمدىلىگى جان باسىنا شاققاندا 27,5 مىڭ دوللار قۇراپ, 5,8% ارتتى. ونىڭ دەڭگەيىن 106,3% جەتكىزۋ جوسپارلانۋدا. ۋران جانە مەتاللۋرگيا ءوندىرۋ كولەمىنىڭ 2,1%-عا ارتۋى ەسەبىنەن تاۋ-كەن ونەركاسىبى ءونىم كولەمى 180 ملرد تەڭگەنى قۇرادى. ال اۋىل شارۋاشىلىعىندا 405,6 ملرد تەڭگەنىڭ ءونىمى ءوندىرىلىپ, وتكەن جىلدان 67,5 ملرد تەڭگەگە ارتقان. كاسىپكەرلىك سالاسى بويىنشا 143 166 شاعىن جانە ورتا كاسىپكەرلىك سۋبەكتىلەرىمەن 215 ملرد تەڭگەنىڭ ءونىمى ءوندىرىلىپ, وتكەن جىلدىڭ سايكەس كەزەڭىمەن سالىستىرعاندا 2 ەسە ءوسىمدى قۇراپ وتىر. وبلىس اكىمى كەلتىرگەن دەرەككە جۇگىنسەك, ءوڭىردىڭ يندۋستريالىق الەۋەتىن جاقسارتۋ ماقساتىندا 698,2 گەكتار اۋماقتا 9 يندۋستريالىق ايماق قۇرىلىپ, ينفراقۇرىلىم تارتىلعان. يندۋستريالىق ايماقتاردا جالپى قۇنى 37,1 ملرد تەڭگە بولاتىن, 4 293 جۇمىس ورنىن اشۋعا مۇمكىندىك بەرەتىن 59 جوبا جۇزەگە اسىرىلۋدا. بۇگىندە 37 جوبا ىسكە قوسىلىپ, 1 572 جۇمىس ورنى اشىلدى, ينۆەستيتسيا كولەمى – 27,8 ملرد تەڭگە. بيىل 683 جۇمىس ورنىمەن 6 جوبانى ىسكە اسىرۋ جوسپارلانعان. بيزنەس-كليماتتى جاقسارتۋ بويىنشا ءىرى جوبالاردى ىسكە اسىرۋعا وبلىسقا 321,7 ملرد تەڭگە ينۆەس­تي­تسيا باعىتتالعان, بۇل وتكەن جىلدىڭ ءتيىستى كەزەڭىنە قاراعاندا 20,2%-عا ارتىق.

سونداي-اق ءبىلىم, دەنساۋلىق ساقتاۋ, مادەنيەت, سپورت سالالارىن جانە جاستار ساياساتىن دامىتۋ جونىندەگى ءىس-شارالار ناتيجەلى جۇزەگە اسىرىلۋدا. مىسالى, وبلىس بويىنشا 18,2 ملرد تەڭگەگە 78 مەكتەپتىڭ قۇرىلىسى جۇرگىزىلۋدە. ونىڭ ىشىندە, 70 مەكتەپ – وبلىستىق بيۋدجەت ەسەبىنەن (16,1 ملرد تگ.), 8 مەكتەپ – «اۋىل – ەل بەسىگى» جوباسىمەن (2,1 ملرد تگ). ودان بولەك, تۇركىستان قالاسىندا 720 ورىندىق نازارباەۆ زياتكەرلىك مەكتەبى سالىنۋدا. حالىقتى ساپالى اۋىز سۋمەن قامتاماسىز ەتۋ ماقساتىندا وبلىستا بيىل 60 سۋمەن جابدىقتاۋ نىسانىنىڭ قۇرىلىسىنا بيۋدجەتتەن 12,7 ملرد تەڭگە ءبولىندى. جىل قورىتىندىسىندا اۋىز سۋمەن قامتىلعان ەلدى مەكەندەردىڭ جالپى سانى 710-عا جەتىپ, قامتۋ كورسەتكىشى 93,3% بولادى دەپ جوسپارلانۋدا. بۇل ورايدا قازىعۇرت اۋدانىندا وگەم وزەنىندە كاسكادتى گەس-پەن بىرگە سۋ قۇبىرى قۇرىلىسى جوباسى ىسكە اسىرىلادى. جوبا قۇنى – 130 ملرد تەڭگە, ىسكە اسىرۋ مەرزىمى – 2021-2025 جىلدار. قۇرىلىس بارىسىندا 500 جۇمىس ورنى اشىلادى. جوبانى ىسكە اسىرۋ وبلىستىڭ وڭتۇستىك ايماقتارىنداعى 1 ملن ادامدى تۇراقتى اۋىز سۋمەن قامتاماسىز ەتۋگە مۇمكىندىك بەرەدى. جالپى, الداعى 5 جىلدا ەلدى مەكەندەر 100% اۋىز سۋمەن قامتاماسىز ەتىلەدى. ال گازبەن قامتىلعان ەلدى مەكەندەر سانىن بيىل 444-كە جەتكىزۋ, 5 جىلدا 85,4%-عا نەمەسە 722 ەلدى مەكەندى قامتاماسىز ەتۋ جوسپارلانۋدا. بيىل 58 ەلەكترمەن جابدىقتاۋ نىساندارىنىڭ قۇرىلىسىنا 9,1 ملرد تەڭگە بولىنگەن. جىل قورىتىندىسىندا 16 ەلدى مەكەن (23 500 حالىق) ساپالى جارىقپەن قامتىلاتىن بولادى. سونىمەن قاتار تۇركىستان قالاسىندا مەملەكەت-جەكەمەنشىك ارىپ­تەس­تىگى اياسىندا جىلۋ-ەنەرگەتيكالىق ورتا­لىعى سالىنادى. بيۋدجەت ەسەبىنەن تەحنيكالىق-ەكونوميكالىق نەگىزدەمەسى جانە جوبالاۋ-سمەتالىق قۇجاتتاماسى ازىرلەنۋدە. ينۆەستيتسيا كولەمى – 36,5 ملرد تەڭگە. قۇرىلىس بارىسىندا 450 جاڭا جۇمىس ورنى قۇرىلادى. ناتيجەسىندە, تۇركىستان قالاسى تولىق جىلۋ جانە ەلەكتر قۋاتىمەن قامتىلادى. وڭىردەگى قۇرىلىس جۇمىستارىنىڭ كولەمى 148,1 ملرد تەڭگەنى قۇراپ, 23,9%-عا ارتتى, جىل سوڭىنا دەيىن 305,9 ملرد تەڭگەگە جەتكىزۋ جوسپارلانۋدا. جىل قورى­تىندىسى بو­يىنشا جالپى 85 كوپ­قابات­تى تۇرعىن ءۇي نەمەسە 328,3 مىڭ شارشى مەتر پايدالانۋعا تاپسىرىلماق. ياعني 5 229 وتباسى باسپانالى بولادى, ونىڭ ىشىندە 708 پاتەر – الەۋمەتتىك وسال توپ­تاعى وتباسىلارعا, 1 103 پاتەر – از قام­تىلعان كوپبالالى وتباسىلارعا ساتىپ الۋ قۇقىعىنسىز بەرىلسە, 3 418 پاتەر الەۋ­مەتتىك كرەديتتىك پاتەرلەر رەتىندە جەڭىل­دە­تىلگەن باعامەن ساتىلاتىن بولادى.

وڭىردە اتقارىلعان تىرلىك اۋقىمدى, ەرتەڭگى كۇننىڭ ەنشىسىندەگى جۇمىستار دا از ەمەس. بۇل ورايدا مەملەكەت باسشىسى سۋمەن قامتاماسىز ەتۋ جۇمىستارىن جانە ايماقتاعى وزگە دە قولعا الىنعان جوبالاردى كەزەڭ-كەزەڭىمەن, ۋاقتىلى جۇرگىزىپ, تياناقتى اياقتاۋدى تاپسىردى.