تۇركىستان قالاسىندا قازاقستان ونكولوگتەرى مەن راديولوگتەرىنىڭ VIII سەزى ءوتتى. ماڭىزدى شارادا زاماناۋي ونكولوگيانىڭ وزەكتى ماسەلەلەرى, سونىڭ ىشىندە COVID-19 پاندەمياسى جاعدايىندا ونكولوگيالىق كومەك كورسەتۋ ماسەلەلەرى تالقىلاندى.
شەتەلدىك جانە وتاندىق ماماندار, الەمنىڭ جەتەكشى عىلىمي جانە كلينيكالىق ورتالىقتارىنىڭ عالىمدارى مەن تاجىريبەشىلەرى ءتۇرلى تاقىرىپتا بايانداما جاسادى. سونىمەن قاتار قازاق ونكولوگيا جانە راديولوگيا عىلىمي-زەرتتەۋ ينستيتۋتى ماماندارى شەتەلدىك حيرۋرگتەرمەن بىرلەسىپ ونكوگينەكولوگيا, ماممولوگيا, توراكالدى ونكولوگيا بويىنشا شەبەرلىك-ساعاتتار وتكىزدى.
سەزگە ونلاين رەجىمدە قاتىسقان پرەمەر-ءمينيستردىڭ ورىنباسارى ەرالى توعجانوۆ ەلىمىزدە ونكولوگيالىق كومەكتى جەتىلدىرۋ دەنساۋلىق ساقتاۋ سالاسىن دامىتۋدىڭ 2020-2025 جىلدارعا ارنالعان مەملەكەتتىك باعدارلاماسىنىڭ جانە ونكولوگيالىق اۋرۋلارمەن كۇرەس جونىندەگى 2018-2022 جىلدارعا ارنالعان كەشەندى جوسپاردىڭ مىندەتتەرىن ىسكە اسىرۋ شەڭبەرىندە جۇزەگە اسىرىلاتىنىن اتاپ ءوتتى.
«بۇگىنگى تاڭدا وتاندىق ونكولوگيا پراكتيكاسىنا ىسىكتەردى ەرتە دياگنوستيكالاۋ مەن ەمدەۋدىڭ مولەكۋلالىق-گەنەتيكالىق, يممۋنوگيستوحيميالىق زەرتتەۋلەر, تارگەتتىك تەراپيا, جوعارى تەحنولوگيالىق ساۋلەلىك جانە حيميوتەراپيا, يممۋنوتەراپيا, ەڭ از ءينۆازيۆتى, لاپوروسكوپيالىق, اعزانى ساقتايتىن وپەراتسيالار سياقتى قازىرگى زامانعى ادىستەرى كەڭىنەن ەنگىزىلگەن. 2008 جىلدان باستاپ جاتىر موينى وبىرىن, كولورەكتالدى وبىردى, ءسۇت بەزى وبىرىن سكرينينگتەۋ باعدارلامالارى ىسكە اسىرىلۋدا. ەلىمىزدە ونكولوگيالىق كومەك ينفراقۇرىلىمىن دامىتۋ جالعاسۋدا, 2019 جىلى پاۆلوداردا جاڭا ونكولوگيالىق ورتالىق ىسكە قوسىلدى. بىلتىر ماڭعىستاۋ وبلىسىندا ونكولوگيالىق ورتالىقتار سالىندى. جامبىل وبلىسىندا جاڭا ونكولوگيالىق ورتالىقتىڭ قۇرىلىسى اياقتالۋدا. بارلىق كلينيكالار زاماناۋي ەمدەۋ-دياگنوستيكالىق جابدىقتارمەن: جەلىلىك ۇدەتكىشتەرمەن, كت جانە مرت اپپاراتتارىمەن, ەندوسكوپيالىق جابدىقپەن جاراقتالادى, الماتى, وسكەمەن, اتىراۋ, پاۆلودار قالالارىندا جاڭا جەلىلىك جىلدامداتقىشتار ورناتىلدى. ونكولوگيالىق اۋرۋلارمەن كۇرەس جونىندەگى كەشەندى جوسپار شەڭبەرىندە نۇر-سۇلتان جانە الماتى قالالارىندا پەت-دياگنوستيكا ورتالىقتارى تابىستى جۇمىس ىستەيدى. 2022 جىلدىڭ سوڭىنا دەيىن نۇر-سۇلتان, سەمەي, شىمكەنت قالالارىندا جانە اقتوبە وبلىسىندا قوسىمشا پەت-ورتالىقتارىن اشۋ جوسپارلانعان. بيىل ساۋىردە سەمەي قالاسىندا راديويزوتوپتىق دياگنوستيكا مەن راديونۋكليدتىك تەراپيانى قولدانا وتىرىپ, قازاقستانداعى العاشقى يادرولىق مەديتسينا ورتالىعى اشىلدى. راديودتەراپيامەن ەمدەۋدى جۇرگىزۋ باستالدى. ونكولوگيادا كورسەتىلەتىن كومەك پەن كادرلاردى دايارلاۋ ساپاسىنا قويىلاتىن تالاپتار ەداۋىر ارتتى. ويتكەنى ءتىپتى ەڭ جوعارى سىنىپتى اپپاراتۋرانى دا دايارلانعان ماماندارسىز ءتيىمدى پايدالانۋ مۇمكىن ەمەس. قازاقستاندا قاتەرلى ىسىكتى زەرتتەۋ بويىنشا حالىقارالىق ىنتىماقتاستىق بەلسەندى دامىپ كەلەدى. وسى ىنتىماقتاستىقتىڭ ناتيجەسى 15-تەن استام ەلدىڭ حالىقارالىق ساراپشىلارىنىڭ سەزد جۇمىسىنا قاتىسۋى بولىپ تابىلادى. قازاقستان ونكولوگتەرى مەن راديولوگتەرىنىڭ VIII سەزى اياسىندا قازاقستاندىق جانە شەتەلدىك ماماندار اراسىندا تاجىريبە مەن ءبىلىمنىڭ, ونكولوگيا سالاسىنداعى سوڭعى عىلىمي جەتىستىكتەردىڭ الماسۋى وتەتىنىنە, بۇل جالپى العاندا, ەلىمىزدىڭ تۇرعىندارىنىڭ دەنساۋلىعىن نىعايتۋعا قىزمەت ەتەتىنىنە سەنىم بىلدىرەمىن», دەدى پرەمەر-ءمينيستردىڭ ورىنباسارى.
ال دەنساۋلىق ساقتاۋ ءمينيسترى الەكسەي تسوي پاندەميانىڭ كۇردەلى كەزەڭىنە قاراماستان, عالىمدار مەن دارىگەرلەر ءوز جۇمىستارىن جالعاستىرىپ, قاتەرلى اۋرۋلارمەن كۇرەسۋدىڭ جاڭا تاسىلدەرىن ىزدەستىرۋدە ەكەنىن ايتىپ ءوتتى.
گيبريدتى فورماتتا وفلاين جانە ونلاين رەجىمدە وتكەن سەزد جۇمىسىنا فرانتسيا, يسپانيا, اقش, تۇركيا, كورەيا, گرۋزيا, رەسەي, ۋكراينا جانە تمد ەلدەرىنىڭ جەتەكشى عىلىمي جانە كلينيكالىق ورتالىقتارىنىڭ عالىمدارى مەن تاجىريبەلى ونكولوگ-ماماندارى, سونداي-اق تۇركىستان وبلىسى اكىمىنىڭ ورىنباسارى ارمان سابيتوۆ, وبلىستىق قوعامدىق دەنساۋلىق باسقارماسىنىڭ باسشىسى مارات پاشيموۆ, دەنساۋلىق ساقتاۋ مينيسترلىگىنىڭ باس ونكولوگى, «قازاق ونكولوگيا جانە راديولوگيا عزي» اق باسقارما ءتورايىمى ديليارا قايداروۆا قاتىسقانىن ايتا كەتەلىك.
باسقوسۋ باعدارلاماسىندا ونكولوگيالىق قىزمەتتى ۇيىمداستىرۋ, اۋرۋلاردىڭ الدىن الۋ جانە ەرتە دياگنوستيكالاۋ, ىسىكتەردىڭ مولەكۋلالىق بيولوگيالىق ەرەكشەلىكتەرى, ساۋلەلىك دياگنوستيكا, حيرۋرگيانىڭ زاماناۋي جەتىستىكتەرى, سكرينينگتىك باعدارلامالاردى ىسكە اسىرۋ, قاتەرلى ىسىكتەردىڭ دامۋى مەن ەۆوليۋتسياسىنداعى عىلىمي جاڭالىقتار سىندى زاماناۋي ونكولوگيانىڭ وزەكتى ماسەلەلەرىنىڭ كەڭ اۋقىمى قامتىلدى.
اكادەميك, پروفەسسور, قازوجرعزي باسقارما ءتورايىمى د.قايداروۆا سەزد شەڭبەرىندە ەلىمىزدىڭ جانە شەتەلدىك ماماندار اراسىندا تاجىريبە الماسۋ ءونىمى الىنعان ءبىلىم كەڭ تاجىريبەگە ەنگىزىلەتىنىن ايتتى. سونداي-اق سەزدە رەسەي, قىرعىزستان, وزبەكستان, تاجىكستان جانە ۋكراينا ەلدەرىنىڭ ونكولوگيالىق قىزمەتتەرىنىڭ باسشىلارى ءسوز سويلەدى.
ايتا كەتەلىك, تۇركىستان وبلىسىندا بيىلعى 9 ايدىڭ قورىتىندىسى بويىنشا قاتەرلى ىسىكتەن پايدا بولعان اۋرۋشاڭدىلىق كورسەتكىشى – 79,6, ياعني 1 227 ناۋقاس. بۇل كورسەتكىش وتكەن جىلمەن سالىستىرعاندا 7,7%-عا وسكەن. دەگەنمەن ءولىم-ءجىتىم كورسەتكىشى تومەندەگەن, ياعني بيىل 696 جاعداي تىركەلگەن. وتكەن جىلدىڭ وسى مەرزىمىندە 733 جاعداي ورىن العان. قاتەرلى ىسىكتەردى ەرتە ساتىسىندا انىقتاۋ كورسەتكىشى 9 ايدىڭ قورىتىندىسى بويىنشا 17,6%-دى قۇرادى (215 جاعداي), بۇل كورسەتكىش وتكەن جىلدىڭ وسى مەرزىمىمەن سالىستىرعاندا 4,9%-عا جوعارىلاعان.
تۇركىستان