بۇگىندە الماتىدا بالالار مەن جاسوسپىرىمدەردىڭ بوس ۋاقىتىن وتكىزۋگە ارنالعان ءجۇز شاقتى ورتالىق جۇمىس ىستەيدى. ۇيىرمەلەر مەن سەكتسيالار جۇمىسىنا قالالىق اكىمدىك قولداۋ كورسەتىپ كەلەدى.
ناتيجەسىندە, اتا-انالار بالالاردىڭ بوس ۋاقىتىنا بولا الاڭداماي, جەرگىلىكتى اتقارۋشى ورگانداردىڭ قولداۋىمەن اشىلعان تەگىن سەكتسيالار مەن مەكتەپتەن تىس ۇيىرمەلەرگە قاتىستىرا الادى. قالا اكىمىنىڭ ورىنباسارى ەرجان باباقۇماروۆ پرەزيدەنتتىڭ بۇقارالىق سپورتتى دامىتۋ تۋرالى تاپسىرماسىن ىسكە اسىرۋ ماقساتىندا بالالاردىڭ سالاماتتى ءومىر سالتىن ۇستانۋىنا بارىنشا جاعداي جاسالىپ وتىرعانىن جەتكىزدى. ەسكى فۋتبول الاڭدارىن جاڭعىرتىپ, زاماناۋي سپورت كەشەندەرىن سالۋ دا وسى باعىتتا قاراستىرىلىپ وتىرعان مىندەتتەر. بالالاردىڭ كاسىبي, سونداي-اق بۇقارالىق سپورتپەن اينالىسۋىن قامتاماسىز ەتۋ ماقساتىندا بىلتىردان باستاپ مەكتەپتەر جانىنداعى سپورت ايماقتارىنىڭ ينفراقۇرىلىمى جەتىلدىرىلۋدە.
وسى ورايدا بيىل بارلىعى 61 مەكتەپ جانىنداعى سپورت نىساندارىن جاڭعىرتۋ جوسپارلانسا, وندا 73 فۋتبول, 63 ۆولەيبول جانە باسكەتبول الاڭدارى, سونداي-اق ۆوركاۋت-ايماقتار مەن جۇگىرۋ جولدارى بار. بۇل الاڭداردا كاسىبي ماماندارمەن جاتتىعۋ جاعى دا قاراستىرىلعان. ناتيجەسىندە, بالالاردىڭ سپورتقا دەگەن ىنتاسىنىڭ ارتا تۇسەتىنى ءسوزسىز. قازىرگى كەزدە مەملەكەت-جەكە مەنشىك ارىپتەستىك اياسىندا 8 سپورت الاڭى قالپىنا كەلتىرىلۋدە. ونىڭ ىشىندە 4 ستاديوننىڭ جۇمىسى اياقتالىپ, قالعان قۇرىلىس-مونتاجداۋ نىساندارى وسى جىلدىڭ جەلتوقسانىنا دەيىن بەرىلمەك. جالپى, 8 جوبا بويىنشا ينۆەستيتسيا سوماسى 400 ملن تەڭگەدەن اسادى. وسى ورايدا بارلىق قۇرىلىپ جاتقان ينفراقۇرىلىم مەملەكەت مەنشىگىندە ەكەنىن اتاپ ءوتۋ قاجەت. قالادا 4 جاستان 18 جاسقا دەيىنگى بالالارعا ارنالعان تەگىن سەكتسيالار سپورتتىڭ 71 ءتۇرى بويىنشا مەملەكەتتىك تاپسىرىس اياسىندا جۇزەگە اسىپ كەلەدى. بۇگىندە 24 مىڭ ءوتىنىش بەرۋشىگە ۆاۋچەر تابىس ەتىلىپ, 18 630 بالا سپورتتىڭ 26 ءتۇرى بويىنشا شۇعىلدانۋدا. ەڭ تانىمال سەكتسيالاردىڭ قاتارىنا فۋتبول, تاەكۆوندو, كاراتە, ءجۇزۋ, دزيۋدو كىرەدى. ال 2023 جىلعا قاراي ورتالىقتار سانىن 200-گە دەيىن جەتكىزۋ جوسپارلانعان.