ەلوردادا كاسىپكەرلىك نىسانداردىڭ كارانتين تالاپتارىن ساقتاۋ جاعدايىن قاداعالاۋ جالعاسىپ جاتىر. مونيتورينگتىك توپ مۇشەلەرى كۇشەيتىلگەن رەجيمدە جۇمىس ىستەۋدە, دەپ حابارلايدى Egemen.kz.
«15 قازان كۇنى 9 ەلوردالىق مەكەمە كارانتين تالاپتارىن بۇزدى. الماتى اۋدانىندا «لاپشا» مەيرامحاناسى, «كيش ميش», «Gentles» كافەلەرى, «مارمەلاد» لاۋندج-بارى بەلگىلەنگەن جۇمىس رەجيمىن ساقتاعان جوق.
سارىارقا اۋدانىندا ورنالاسقان «بارۆيحا» لاۋندج-بارىندا, «Oina» ويىن كلۋبىندا, «رىبا موەي مەچتى» كاراوكەسىندە دە كارانتين شارالارى بۇزىلدى. سونداي-اق, ءتارتىپ بۇزۋشىلار تىزىمىنە ەسىل اۋدانىنداعى «Garage» مەيرامحانالىق كەشەنى مەن «Inforno» رەستوبارى ەندى», دەلىنگەن حابارلامادا.
كارانتين تالاپتارىن بۇزۋ تۋرالى مالىمەتتەر اكىمشىلىك شارا قابىلداۋ ءۇشىن سانيتارلىق-ەپيدەميولوگيالىق باقىلاۋ سالاسىنداعى ۋاكىلەتتى ورگانعا جولداندى. قالالىق اكىمدىك ءوز كەزەگىندە ىندەت تارالۋىنىڭ ازايعانىنا قاراماستان, كوروناۆيرۋستان قورعانۋدىڭ ءتاسىلى ۆاكتسينا الۋ جانە سانيتارلىق تالاپتاردى ساقتاۋ ەكەنىن ەسكەرتەدى.