ەڭ از جالاقى الاتىن وڭىرلەر انىقتالدى

بۇل تۋرالى ۇلتتىق ستاتيستيكا بيۋروسى ءمالىم ەتتى.

«2020 جىلى حالىقتىڭ ورتا ەسەپپەن جان باسىنا شاققانداعى اتاۋلى اقشالاي تابىستارى ايىنا ورتا ەسەپپەن 116 126 تەڭگەنى قۇرادى جانە اتاۋلى ماندە 2019 جىلمەن سالىستىرعاندا 11,4% ءوستى. وسى كەزەڭدەگى تۇتىنۋ تاۋارلارى مەن كورسەتىلەتىن قىزمەتتەرگە باعالاردىڭ 6,8% ءوسىمى كەزىندە حالىقتىڭ ناقتى اقشالاي تابىستارى وتكەن جىلمەن سالىستىرعاندا 4,3% جوعارىلادى.

2020 جىلى حالىقتىڭ ورتا ەسەپپەن جان باسىنا شاققانداعى اتاۋلى اقشالاي تابىستارىنىڭ مولشەرى بويىنشا ەڭ جوعارى ءمانى اتىراۋ وبلىسىندا بايقالدى, وندا وسى كورسەتكىش ورتاشا رەسپۋبليكالىق دەڭگەيدەن 2 ەسەگە جۋىق ارتتى», دەلىنگەن ۆەدومستۆو حابارلاماسىندا.

تابىسى ەڭ تومەن وڭىرلەر رەتىندە تۇركىستان وبلىسى جانە شىمكەنت قالاسى بەلگىلەندى. بۇل وڭىرلەردەگى حالىقتىڭ تابىس مولشەرى ورتاشا رەسپۋبليكالىق دەڭگەيدىڭ 55-65%-ن قۇرادى.

وتكەن جىلى وڭىرلەر بويىنشا حالىقتىڭ جان باسىنا شاققانداعى تابىسىنىڭ ەڭ جوعارعى جانە ەڭ تومەنگى شاماسى اراسىنداعى ايىرماشىلىق 3,4 ەسەنى قۇرادى (2019 جىلى – 4 ەسە).