الماتىدا بيىل ءبىرىنشى رەت قالالىق ءبىلىم باسقارماسى 2020 جىلى ۇزدىك ناتيجە كورسەتكەن مەملەكەتتىك مەكتەپتەردىڭ رەيتينگىسىن جاسادى. باعالاۋ بارىسىندا مەكتەپتەردەگى ۇزدىك جانە ەكپىندى وقۋشىلاردىڭ سانى مەن وقۋشىلاردىڭ وليمپيادالارعا قاتىسۋى دا ەسكەرىلگەن. الماتىنىڭ ەڭ جاڭا اۋدانى – ناۋرىزباي اۋدانىنىڭ مەكتەپتەرى قالانىڭ 5 ۇزدىك ءبىلىم بەرۋ مەكەمەسىنىڭ قاتارىنا قوسىلدى.
قالالىق رەيتينگتە ءبىرىنشى ورىنعا 97,74% ناتيجەمەن 32 مەكتەبى بار اۋەزوۆ اۋدانى ورنىقتى. ەكىنشى ورىندا المالى اۋدانى – 90,31%, مۇندا 29 مەكتەپ جۇمىس ىستەيدى. تۇركسىب اۋدانى 87,26% كورسەتكىشپەن ۇزدىك ۇشتىكتى تۇيىندەپ وتىر. قالاعا كەيىن قوسىلعان ناۋرىزباي اۋدانى مەكتەپتەردىڭ قالالىق رەيتينگىندە ءتورتىنشى ورىندى يەلەندى. قازىرگى كەزدە اۋداننىڭ 9 مەكتەبىندە 16 مىڭعا جۋىق بالا وقيدى, ءاربىر ءۇشىنشى بالا ۇزدىكتەر قاتارىندا, وقۋشىلاردىڭ 40%-دان استامى – وقۋ ەكپىندىلەرى, ال 2020 جىلعى وليمپياداعا 340 وقۋشى قاتىستى. سول سياقتى جىل سايىن قازاق مەكتەپتەرى وقۋ ۇدەرىسىنە جاڭاشىلدىق ەنگىزە وتىرىپ, كوشباسشىلىق ورىندار ءۇشىن جارىسقا ءتۇسىپ وتىر.
2021 وقۋ جىلىندا پرەمەر-مينيستر اسقار مامين BINOM School, ياعني قازاقستاندىق ءبىلىم بەرۋ ۇدەرىسىنە وزىق ادىستەردى ەنگىزۋدىڭ جاڭا برەندىن ۇسىنعان بولاتىن. مۇنداي فورماتتاعى مەكتەپتەر ازىرگە ەلوردادا عانا اشىلىپ جاتىر. ءوز كەزەگىندە, الماتىلىق مەكتەپتەر دە جاڭاشىلدىققا ۇمتىلادى. مىسالى, مۇعالىمدەر كۇنى قارساڭىندا ناۋرىزباي اۋدانىنىڭ №174 مەكتەپ-گيمنازياسىندا روبوتتەحنيكا سىنىبى اشىلدى. قازىرگى تاڭدا بۇل مەكتەپ قالا مەكتەپتەرىنىڭ رەيتينگىسىندە 59-ورىندا تۇر. وسى №174 گيمنازياسىن 2017 جىلى ء«سابي» قايىرىمدىلىق قورى سالىپ, پايدالانۋعا بەرگەن بولاتىن (قۇرىلتايشىلارى – ينۆەستور كەڭەس راقىشەۆ پەن ەكولوگ اسەل تاسماعامبەتوۆا). بۇل وسى ۋاقىتقا دەيىن جەكە قاراجات ەسەبىنەن وسىنداي ماسشتابتاعى (12 مىڭ شارشى مەتر, 1 200 وقۋشى, 3 گەكتار اۋماق) نىساننىڭ سالىنىپ, قالاعا تەگىن سىيعا تارتىلعان بىردەن-ءبىر مىسالى. ء«سابي» قورى روبوتتەحنيكا ساباعىن ۇيىمداستىرۋعا كەتكەن شىعىنداردى دا ءوز موينىنا الدى.
مامانداندىرىلعان كەڭسەدە كۇردەلى جوندەۋ جۇرگىزىلدى, 16 زاماناۋي نوۋتبۋك, ەكى 3D پرينتەر, 3D سكانەر, ينتەراكتيۆتى پانەل جانە باسقا دا يننوۆاتسيالىق قۇرىلعىلار ورناتىلدى. جوبانىڭ جالپى قۇنى 10,6 ملن تەڭگەدەن استى.
ء«بىز بۇل مەكتەپتى الماتى قالاسىنىڭ اكىمدىگىنە تاپسىرعاننان كەيىن دە ءبىلىم بەرۋ مەكەمەسىنە قولداۋ كورسەتۋدى جالعاستىرىپ جاتىرمىز. جۇيەلى تۇردە جوعارى سىنىپ وقۋشىلارى ءۇشىن كاسىبي تەستىلەۋ وتكىزەمىز. تۇلەكتەردى جوعارى وقۋ ورىندارىنا تۇسۋگە دايىندايمىز جانە ءبىلىم گرانتتارىن الۋعا مۇمكىندىك بەرەمىز, شەت تىلدەرىن, ماتەماتيكا مەن باعدارلامالاۋدى تەرەڭدەتىپ وقىتۋ كۋرستارىن ۇيىمداستىرىپ ءجۇرمىز. ماقسات – مەكتەپ اكىمشىلىگىمەن بىرلەسە وتىرىپ, وسى جوبالار ارقىلى №174 گيمنازيانى الماتى قالاسىنىڭ ۇزدىك مەكتەپتەرىنىڭ رەيتينگىنە شىعارۋ. ءبىز جاڭا روبوتتەحنيكا سىنىبىن اشقاننان كەيىن, وقۋشىلاردىڭ جوعارى ناتيجەلەرگە جەتۋگە قوسىمشا ىنتالاندىرۋ بولادى دەپ ۇمىتتەنەمىز», دەيدى ء«سابي» قورىنىڭ نەگىزىن قالاۋشى اسەل تاسماعامبەتوۆا.