قر ستراتەگيالىق جوسپارلاۋ جانە رەفورمالار جونىندەگى اگەنتتىكتىڭ ۇلتتىق ستاتيستيكا بيۋروسىنىڭ باسشىسى نۇربولات ايداپكەلوۆ ۇلتتىق حالىق ساناعىنىڭ ارالىق قورىتىندىلارىن باياندادى, دەپ حابارلايدى Egemen.kz.
«ۇلتتىق حالىق ساناعىنىڭ باستالعانىنا ءبىر اي بولدى. وزدەرىڭىز بىلەتىندەي, بۇگىنگە دەيىن ساناق تەك ونلاين رەجيمدە ءوتتى. بۇل مۇمكىندىك 15 قازانعا دەيىن قولجەتىمدى بولاتىنىن اتاپ وتكىم كەلەدى. ساناق سۇراقتارىنا جاۋاپ بەرۋدىڭ بىرنەشە جولى بار. بۇل sanaq.gov.kz مامانداندىرىلعان سايتى, E-Gov پورتالى ارقىلى, سونداي-اق Aitu ءموبيلدى قوسىمشاسىن پايدالانا وتىرىپ اۆتوريزاتسيادان وتۋگە بولادى», دەدى ن. ايداپكەلوۆ ورتالىق كوممۋنيكاتسيالار قىزمەتىندە وتكەن بريفينگىدە.
1 قازان ساعات 11:00-دەگى جاعداي بويىنشا ونلاين ساناقتان 6 429 018 ادام نەمەسە 33,8% ازامات ءوتتى. اتاپ وتەرلىگى, رەسپوندەنتتەردىڭ 86 پايىزدان استامى سمارتفون ارقىلى ساناقتان وتكەن.
«ساناقتان ونلاين رەجيمدە وتكەندەر سانى بويىنشا تۇركىستان وبلىسى كوش باستاپ تۇر. ءوڭىردىڭ 865 مىڭ تۇرعىنى ساناقتان وتكەنى تۋرالى حابارلاما الدى. الماتى وبلىسىندا 705 مىڭ ادام تىركەلگەن. كوشباسشىلار ۇشتىگىن شىعىس قازاقستان وبلىسى تۇيىندەيدى. مۇندا حالىق ساناعىنىڭ سۇراقتارىنا 612 مىڭ ادام جاۋاپ بەردى. وسى كورسەتكىش بويىنشا ماڭعىستاۋ جانە سولتۇستىك قازاقستان وبلىستارىن سوڭعى ورىنداردا. بۇل وڭىرلەردە ساناقتان سايكەسىنشە 181 024 جانە 155 779 ادام ءوتتى», دەدى سپيكەر.
ال ناقتى ءوڭىردىڭ ونلاين ساناقپەن قامتىلعان حالقى بويىنشا, قىزىلوردا وبلىسى كوش باستاپ تۇر. مۇندا 48,8 % ادام قامتىلعان. ەكىنشى ورىندا شىعىس قازاقستان وبلىسى. مۇندا بۇل كورسەتكىش 45%-عا جەتكەن.