ماڭعىستاۋ وبلىسىندا 20 ەتنومادەني بىرلەستىك بار. جاقىندا قازاقستان حالقى اسسامبلەياسى قۇرامىندا ۇنەمى بەلسەندىلىك تانىتىپ, ءتۇرلى شارالاردىڭ باسى-قاسىندا جۇرەتىن ولار, ياعني وزگە ۇلت وكىلدەرى باس قوسىپ, جولداۋعا ءبىراۋىزدان قولداۋ بىلدىرەتىندىگىن جەتكىزدى.
ماڭعىستاۋ وبلىسىندا 20 ەتنومادەني بىرلەستىك بار. جاقىندا قازاقستان حالقى اسسامبلەياسى قۇرامىندا ۇنەمى بەلسەندىلىك تانىتىپ, ءتۇرلى شارالاردىڭ باسى-قاسىندا جۇرەتىن ولار, ياعني وزگە ۇلت وكىلدەرى باس قوسىپ, جولداۋعا ءبىراۋىزدان قولداۋ بىلدىرەتىندىگىن جەتكىزدى.
بۇل باسقوسۋدى ماڭعىستاۋ وبلىستىق قازاقستان حالقى اسسامبلەياسى حاتشىلىعىنىڭ باسشىسى گ.ەسمۋرزينا اشىپ, مەملەكەت باسشىسى ن.نازارباەۆتىڭ قازاقستاندىقتارعا جولدانعان كەزەكتى جولداۋى جايلى ايتىپ ءوتتى.
– ەلباسىنىڭ ءاربىر جىلعى جولداۋلارى بارىمىزگە جاقسى تانىس. سىزدەردىڭ ءار ۋاقىتتا جولداۋلاردى تىڭداپ, قولداۋ ءبىلدىرىپ كەلە جاتقاندارىڭىز بىزگە ءتۇرلى دەڭگەيدەگى بۇقارالىق اقپارات قۇرالدارىنان بەلگىلى. ون سەگىزىنشى بولىپ جولدانعان بيىلعى «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋدىڭ ارقالاپ تۇرعان جۇگى بارىنشا اۋىر جانە ماڭىزدى. ساياسي ماڭىزدىلىعى, مەملەكەتتىك دامۋدىڭ تەتىكتەرىن تياناقتاۋى تۇرعىسىنان الدىڭعى جولداۋلاردى ماعىنالىق جاعىنان تولىقتىرا ءتۇستى. بۇل ەلباسى نۇرسۇلتان نازارباەۆ ءجۇرگىزىپ وتىرعان ساياساتتىڭ ءبىرتۇتاستىعىنىڭ, الىپ مەجەلەردى كەزەڭ-كەزەڭىمەن جۇزەگە اسىرۋ ارقىلى تاۋەلسىز ەلىمىزدى دامىعان 30 ەلدىڭ قاتارىنا قوسۋ ماقساتىنىڭ كورىنىسى, – دەگەن گۇلجان ماقسۇتقىزى جاڭا جولداۋعا توقتالدى.
شاعىن جانە ورتا كاسىپكەرلىكتى دامىتۋ, ەكونوميكا مەن ەنەرگەتيكا, الەۋمەتتىك جانە اۋىل شارۋاشىلىعى سالالارى, كولىك, ترانزيتتىك تەگەۋرىندىلىكتى نىقتاۋ, گەولوگيا سالاسىن دامىتۋدى قولعا الۋ, وتانسۇيگىشتىكتى دامىتۋ باعىتىندا ايتىلعان تاپسىرمالارعا جەكە-جەكە توقتالدى. ەتنومادەني بىرلەستىك وكىلدەرى شاكىرتاقىنىڭ, جالاقىنىڭ وسۋىنە ىقىلاس تانىتۋمەن بىرگە, اقتاۋ تەڭىز پورتىنىڭ جاڭعىرتىلۋىنىڭ, «بەينەۋ – جەزقازعان» تەمىرجول جەلىسى قۇرىلىسىنىڭ سالىنۋىنا بايلانىستى باتىس پەن شىعىس اراسىنداعى «التىن كوپىرگە» اينالۋدىڭ ايماق ءۇشىن ماڭىزدىلىعىن جوعارى باعالادى.
وزگە دەپ وزەككە تەپپەي, باباسىنان باستاپ باۋىرىنا باسقان قازاق ەلىنە ريزا ەتنومادەني بىرلەستىكتەر وكىلدەرىنىڭ ءسوزىن ۇسىنۋدى ءجون سانادىق.
گيۆي سۆانيدزە, «ساكارتۆەلو» گرۋزين ەتنومادەني بىرلەستىگىنىڭ توراعاسى:
– مەملەكەت باسشىسىنىڭ جىل سايىنعى جولداۋلارىنان ۇلتتىق مۇراتتىڭ لەبى ەسىپ تۇرادى. بيىلعى جولداۋ دا ومىرشەڭ يدەيالارعا تولى. ءبىز مۇندا ايتىلعان الىپ باستامالاردى, تىڭ تاپسىرمالاردى تەك بىرلىكتىڭ ارقاسىندا جۇزەگە اسىرا الامىز. ءبىز ەلباسىنا وسىلاي قولداۋ كورسەتۋىمىز كەرەك. مەن نۇرسۇلتان نازارباەۆتىڭ ساياساتى قازاقستاندى العا شىعارادى دەپ ويلايمىن جانە جولداۋدى تولىق قولدايمىن.
يۋسۋپ شاحشاەۆ, «داعىستان» ەتنومادەني بىرلەستىگىنىڭ ءتوراعاسى:
– جولداۋدا ايتىلعان اقتاۋ پورتى – قازاقستاننىڭ ەكونوميكاسى ءۇشىن قانشالىقتى ماڭىزدى ەكەنى بارشاعا بەلگىلى. ال ونىڭ دامۋى, تاسىمالداناتىن جۇك كولەمىنىڭ ارتۋى ماڭعىستاۋ ءوڭىرى ءۇشىن وتە-موتە ءتيىمدى. وعان بەينەۋدەن ورتالىق قازاقستانعا قاراي سالىنىپ جاتقان تەمىرجول قۇرىلىسىن قوسىڭىز. مۇنىڭ ءبارى ايماقتىڭ ءوسىپ-وركەندەۋىنە باستايتىن بولادى. جاڭا جولداۋدى دا قاشانعى داستۇرىنە, سيپاتىنا ساي ءون بويىنا قازاقستاننىڭ بولاشاق دامۋىنىڭ باعىت-باعدارىن جيناپ, تۇتاستىرعان قۇجات بولدى دەپ سانايمىن.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.