اقتوبەدە مەكتەپ ديرەكتورىنىڭ اقشا جيناعانىن, قارجىنى شىبىن-شىركەيدەن قورعايتىن تور ساتىپ الۋعا سۇرالعانىن ايتىپ, ارىز تۇسىرگەندەردىڭ ءىسى قارالدى. ديرەكتوردىڭ مىندەتىن اتقارۋشى جازالاندى, دەپ حابارلايدى Egemen.kz.
وبلىستىق سىبايلاس جەمقورلىققا قارسى ءىس-قيمىل دەپارتامەنتى جاڭا وقۋ جىلى باستالعالى الدىن-الۋ جۇمىسىن كۇشەيتكەن. قازىرگى كەزدە وبلىستاعى ءبىلىم بەرۋ مەكەمەلەرىندە ءتۇرلى كەزدەسۋ وتكىزىلۋدە. وبلىستىق سىبايلاس جەمقورلىققا قارسى ءىس-قيمىل دەپارتامەنتىنىڭ قىزمەتكەرلەرى زاڭنامالاردى ءتۇسىندىرىپ, جەمقورلىقتىڭ الدىن-الۋعا باقىتتالعان جۇمىس جايىن باياندادى.
«بيىل ءبىلىم بەرۋ سالاسىنا قاتىستى 75 قىلمىستىق ءىس تىركەلدى. كوبى پاراقورلىق پەن مەملەكەت مۇلكىن تالان-تاراجعا سالۋعا قاتىستى بولدى. 1424 Call ورتالىعىنا مۇعالىمدەردەن جانە انا-انادان زاڭسىز اقشا جيناۋعا قاتىستى حابارلامالار دا ءتۇسىپ جاتىر. كوبى مەكتەپ قاجەتتىلىگى ءۇشىن اقشا جينايتىنىن ايتادى. تاياۋدا ءبىر اۋدانداعى مەكتەپ ديرەكتورىنىڭ مىندەتىن اتقارۋشى مۇعالىمدەردەن 600 مىڭ تەڭگە اقشا جيناپ العانى تۋرالى حابارلاما ءتۇستى. تەكسەرۋدەن سوڭ اقشانىڭ ءبىلىم بەرۋ ۇيىمىنا, ناقتىلاساق, شىبىن-شىركەيدەن قورعايتىن تورعا باعىتتالعانى انىقتالدى. ديرەكتوردىڭ مىندەتىن اتقارۋشى تارتىپتىك جازاعا تارتىلدى», دەپ حابارلادى وبلىستىق سىبايلاس جەمقورلىققا قارسى ءىس-قيمىل دەپارتامەنتى.