سولتۇستىك كورەيا ليدەرى كيم چەن ىننىڭ بۇيرىعىمەن ءولىم جازاسىنا كەسىلگەن جەزدەسى چان سون تحەكتىڭ اۋلەتى تۇگەل قىرعىنعا ۇشىرادى. بۇل تۋرالى ريا «نوۆوستي» اگەنتتىگىنىڭ اقپارىنا سىلتەمە جاساعان Ras.kz حابارلادى.
«كحدر-دىڭ ءبىرىنشى جوعارعى باسشىسى كيم چەن ىننىڭ بۇيرىعى بويىنشا چان سون تحەك وتباسىنىڭ بارلىق مۇشەلەرى, سونىڭ ىشىندە سابيلەر دە بار – تۇگەل ءولىم قۇشتى», – دەلىنگەن سولتۇستىك كورەياداعى احۋالدان حابارى بار دەرەككوزدىڭ حابارلاماسىندا.
اگەنتتىكتىڭ مالىمەتى بويىنشا, چان سون تحەكتىڭ اپكەسى چان گە سۋن كحدر-دىڭ كۋباداعى ەلشىسى بولعان چون ەن چجينمەن بىرگە, سونداي-اق چان سون تحەكتىڭ مالايزيادا ەلشى بولعان نەمەرە ءىنىسى چان ەن چحول وتكەن جىلعى جەلتوقساندا جيىرما جاستاعى ۇلدارى تە رەنمەن جانە تە ۋنمەن بىرگە پحەنيانعا شاقىرتىپ الىنىپ, اتىلىپ كەتكەن. چان سون تحەكتىڭ ەكى ءىنىسى دە ەرتەرەكتە اۋىرىپ قايتىس بولعان. سوندىقتان رەپرەسسيا ونىڭ اپكەلەرى مەن قارىنداستارىن, سونىڭ ىشىندە ولاردىڭ كىشكەنتاي نەمەرەلەرىن دە قامتىعان. اگەنتتىك حابارلاعانداي, وزدەرىن ۇستاۋعا بارعان اسكەريلەرگە قارسىلىق بىلدىرگەن چان سون تحەك تۋىستارى كورشىلەرىنىڭ كوز الدارىندا, ۇيلەرىنىڭ جانىندا اتىپ ولتىرىلگەن.
سونىمەن بىرگە ۇلت ليدەرىنىڭ جەزدەسىنە قاندىق جاعىنان تۋىس بولىپ كەلمەيتىن ايەلدەر امان قالعان. بىراق ولارعا باسقاشا شارالار قولدانىلعان. ماسەلەن, چان ەن ءچحولدىڭ ايەلىن كۇيەۋىنەن زورلاپ اجىراستىرىپ, ءوزىن سولتۇستىك كورەيانىڭ الىس اۋدانىنا جەر اۋدارىپ جىبەرگەن.
جەلتوقسان ايىنىڭ ورتاسىندا ۇزاق ۋاقىت كيم چەن ىننىڭ رەگەنتى, ياعني رۋحاني ۇستازى ءارى مەملەكەتتەگى ەكىنشى ادام سانالىپ كەلگەن 67 جاستاعى چان سون تحەك سوتتىڭ ۇكىمى بويىنشا اتىلدى. كەيىن ونىڭ ايەلى, كيم چەن ىننىڭ اكەسىنىڭ تۋعان قارىنداسى كيم گەن ءحيدىڭ ميىنداعى ىسىكتى الىپ تاستاۋعا ارنالعان وتادان كەيىن ەس-ءتۇسسىز جاتقانى حابارلانعان. بىراق بۇل ايەلدىڭ سودان كەيىنگى تاعدىرى نە بولعانى ايتىلماي وتىر.
ايدار ورىسباەۆ.
دەرەككوز: Ras.kz
فوتو: Bigmir.net