ۇلتتىق ساناق كەزىندە ۇيالى بايلانىس ناشار جەرلەردە دەرەكتەر اكىمدىكتەر جانىنداعى بىرىڭعاي كولىك ورتاسى ارقىلى تاسىمالدانادى, دەپ حابارلايدى Egemen.kz.
بۇل تۋرالى ۇلتتىق ستاتيستيكا بيۋروسىنىڭ باسشىسى نۇربولات ايداپكەلوۆ ۇكىمەت وتىرىسىندا ايتتى. اۋەلى بيۋرو باسشىسى بيىلعى ساناققا پاندميايمەن, ۆاكتسينامەن بايلانىستى سۇراقتار قسوىلىپ وتىرعانىن اتاپ ءوتتى.
«حالىق ساناعىن وتكىزۋ ءۇشىن 91 سۇراقتان تۇراتىن ساناق پاراقتارى ازىرلەندى. ولار ءۇي شارۋاشىلىقتارىندا تۇراتىن ادامدار سانى تۋرالى, تۇرعىن ءۇي جاعدايلارى تۋرالى سۇراقتارعا جاۋاپ بەرەدى. ءۇي شارۋاشىلىعىنىڭ ءار مۇشەسى تولتىراتىن «جەكە» ساناق پاراقتارى جانە شەتەلدىكتەر ەلدە ۋاقىتشا جۇرگەندەر ءۇشىن ارنايى ساناق پاراقتارى بار. ساناق پاراقتارىنا حالىقتىڭ كوشى-قونى, تىرشىلىك قابىلەتىن شەكتەۋ, پاندەميانىڭ تابىس دەڭگەيىنە اسەرى, كوروناۆيرۋس ينفەكتسياسىمەن سىرقاتتانۋشىلىق جانە حالىقتى ۆاكتسينالاۋ تۋرالى جاڭا سۇراقتار ەنگىزىلدى. جۇمىسپەن قامتۋ, ءتىل مەڭگەرۋ, مەكەن جاعدايى جانە بالا تۋ تۋرالى سۇراقتاردىڭ قاتارى كەڭەيتىلدى», دەدى ۇلتتىق ستايستيكا بيۋروسىنىڭ باسشىسى.
سونداي-اق ول حالىق ساناعىن جۇرگىزۋ كەزەڭىندە بارلىق دەرەكتەر بىردەن شيفرلانعان, قورعالعان تۇردە ورتالىق سەرۆەرگە جىبەرىلىپ وتىراتىنىن ەسكە سالدى.
«ۇيالى بايلانىس جەلىسى بولعان جاعدايدا سەرۆەرگە تىكەلەي پلانشەت ارقىلى, ۇيالى بايلانىس جەلىسى ناشار جەرلەردە جەرگىلىكتى اكىمدىكتەر قوسىلعان مەملەكەتتىك ورگانداردىڭ بىرىڭعاي كولىكتىك ورتاسى ارقىلى وفلاين رەجيمدە جۇزەگە اسىرىلادى. بۇدان باسقا بارلىق اۋماقتىق ستاتيستيكا ورگاندارى قوسىلعان IP VPN ارنايى جەلىسى بويىنشا دەرەكتەردى جونەلتۋ مۇمكىندىگى بار. ساناق جۇرگىزۋ كەزىندە ازاماتتاردان الىناتىن بارلىق شيفرلانعان اقپارات قورعالعان بايلانىس ارنالارى ارقىلى ۇلتتىق ستاتيستيكا بيۋروسىنىڭ ورتالىق سەرۆەرىنە بەرىلەدى. ونلاين ساناقتىڭ ۇزدىكسىز جۇمىسىن قامتاماسىز ەتۋ شەڭبەرىندە رەزەرۆتىك الاڭ (QazCloud) ۇيىمداستىرىلعان», دەدى نۇربولات ايداپكەلوۆ.