شىمكەنت قالالىق قۋىرشاق جانە جاسوسپىرىمدەر تەاترى 1984 جىلى العاش رەت گ.لانداۋدىڭ «كۋ-كا-رە-كۋ» سپەكتاكلىمەن شىمىلدىعىن اشىپ, بۇگىنگە دەيىن ۇزدىكسىز جۇمىس ىستەپ كەلەدى. رەپەرتۋارىندا وتاندىق جانە شەتەلدىك اۆتورلاردىڭ قازاق جانە ورىس تىلدەرىندە 150-گە جۋىق قويىلىمى بار تەاتر 39-شى ماۋسىمىن اشتى.
جاڭا ماۋسىم كورنەكتى جازۋشى-دراماتۋرگ راحىمجان وتارباەۆتىڭ «ساعىنىش ءشوبى» قويىلىمىمەن باستالدى. قازاق دراماتۋرگياسىنىڭ كلاسسيكالىق تۋىندىسى جەلىسىندە ساحنالانعان بۇل قويىلىم تاريحي دەرەكتەرگە نەگىزدەلىپ, كورەرمەنگە ۇلتتىق بولمىس پەن ەرلىكتى, وتانسۇيگىشتىكتى دارىپتەيدى. تەاتر 38-ءشى ماۋسىمىندا قالىڭ كورەرمەندى ءتۇرلى جانرداعى قويىلىمدارمەن ءتانتى ەتكەن-ءدى. اتاپ ايتساق, الەمدىك دەڭگەيدەگى كلاسسيكالىق تۋىندى بولىپ تابىلاتىن ن.گوگولدىڭ «ۇيلەنۋ» كومەدياسى, د.سالاماتتىڭ «قاسقىر ءشوپ جەي مە؟» ەرتەگىسى, م.مالدىباەۆانىڭ «اسىل ءشوپ», ا.التىنبەكوۆتىڭ «راحمەت ساعان, دارىگەر!» قويىلىمدارىنىڭ پرەمەراسىن كورەرمەنگە تارتۋ ەتكەن بولاتىن.
جاڭا ماۋسىمنىڭ قويىلىمدارىن تاماشالاۋعا كەلگەن كورەرمەندەرگە كارانتين تالاپتارىنا سايكەس Ashyq جوباسىمەن كىرۋگە رۇقسات ەتىلەدى. ياعني بەتپەردە رەجىمى مەن الەۋمەتتىك قاشىقتىقتى ساقتاي وتىرىپ, تولىمدىلىعىن 30 پايىزدان اسىرماي قىزمەت كورسەتىلەدى.
شىمكەنت