ەلەۆاتورلاردىڭ ەگىن قابىلداۋ مەن جيناۋعا ازىرلىگىن قامتاماسىز ەتۋ كەرەك. بۇل تۋرالى ۇكىمەت وتىرىسىندا پرەمەر-مينيستر اسقار مامين تاپسىردى, دەپ حابارلايدى Egemen.kz قازاقپاراتقا سىلتەمە جاساپ.
«ەگىن جيناۋعا دايىندىق ماسەلەسىندە دە جۇمىستاردى قارجىلاي جانە ماتەريالدىق-تەحنيكالىق قامتاماسىز ەتۋ بويىنشا بارلىق شارالار قابىلداندى. قازاقستان بولجام بويىنشا ءوزىن استىقپەن تولىق قامتاماسىز ەتەدى», دەدى ا. مامين.
ۇكىمەت باسشىسىنىڭ ايتۋىنشا, ەكسپورتتىق الەۋەت جوعارى دەڭگەيدە قالادى – شامامەن 6,5-7 ملن توننا.
«سوندىقتان باستى مىندەتىمىز – ەگىن جيناۋدى ۋاقتىلى ءارى ساپالى وتكىزۋ. جالپى مىناداي ماسەلەلەرگە كوڭىل بولگىم كەلەدى. بىرىنشىدەن, اۋىل شارۋاشىلىعى مينيسترلىگى مەن وبلىستاردىڭ اكىمدىكتەرى قىس مەزگىلىنە جەم-ءشوپ قورىن ساپالى دايىنداۋ جانە ونىڭ باعالارىن تۇراقتى بولۋىن قامتاماسىز ەتۋ جونىندە بارلىق قاجەتتى شارالاردى قابىلداسىن. ەكىنشىدەن, ەگىندى ساپالى جيناپ قانا قويماي, بيداي ساقتاۋدىڭ ءتيىستى شارتتارىن دا باقىلاۋدا ۇستاۋ كەرەك. ەلەۆاتورلاردىڭ ەگىن قابىلداۋ مەن جيناۋعا ازىرلىگىن قامتاماسىز ەتۋ قاجەت», دەدى اسقار مامين.
سونىمەن قاتار ەنەرگەتيكا مينيسترلىگىنە ەگىن جيناۋ كەزىندە جانار-جاعارمايمەن ۋاقتىلى قامتاماسىز ەتۋ ماسەلەسىن تۇراقتى باقىلاۋدا ۇستاۋ تاپسىرىلدى.