اۋعانستان يسلام رەسپۋبليكاسىنداعى احۋالدىڭ شيەلەنىسۋىنە بايلانىستى قارۋلى كۇشتەردە قىراعىلىقتى كۇشەيتۋ بويىنشا شارالار قابىلداندى. ەڭ الدىمەن, بۇل ارنايى وپەراتسيالار كۇشتەرىنە, مايدان جانە اسكەري-كولىك اۆياتسياسىنا, اۋە شابۋىلىنا قارسى قورعانىسقا قاتىستى بولىپ وتىر, دەپ جازادى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.
قورعانىس ءمينيسترى وڭىردەگى جاعدايدى قاداعالاۋ جانە تالداۋ, كۇشتەر مەن قۇرالداردىڭ تاۋلىكتىك كەزەكشىلىكتى ۇيىمداستىرۋ بويىنشا مىندەتتەر قويدى. جوعارى قىراعىلىقتى قامتاماسىز ەتۋ ماقساتىندا اسكەري قىزمەتشىلەردىڭ كەزەكشىلىك اتقارۋى بويىنشا جۇكتەمەنى بىردەي ءبولۋ قاجەتتىلىگى اتاپ ءوتىلدى.
«تۋىندايتىن سىن-قاتەردى ۇدايى باعالاپ, قازىرگى ۋاقىتتا ءبىز ءۇشىن اناعۇرلىم ماڭىزدى جانە نەگىزگى كۇش-جىگەردى قايدا باعىتتاۋ كەرەك ەكەنىن ايقىنداۋ قاجەت», دەپ اتاپ ءوتتى گەنەرال-لەيتەنانت نۇرلان ەرمەكباەۆ.
الداعى اپتاعا جوسپارلانىپ وتىرعان جاۋىنگەرلىك وقۋ-جاتتىعۋ بارىسى تۋرالى باياندالدى.
جاۋىنگەرلەر 22 تامىزدان باستاپ «ارحو – 2021» كونكۋرستارىنا قاتىسا باستايدى.
زاپاستاعى, اسىرەسە تاپشى ماماندىعى بار وفيتسەرلەردى اسكەري قىزمەتكە شاقىرۋ ماسەلەسى كوتەرىلدى. اتاپ ايتقاندا, ارميانىڭ ەپيدەمياعا قارسى ءىس-شارالارعا قاتىسۋى زاپاستاعى وفيتسەرلەرگە سۇرانىس ارتتىردى. اتاپ ايتقاندا, اسكەري كافەدرادا دايىندالاتىن جانە وفيتسەر اتاعىن العاننان كەيىن ارميادا قىزمەت وتكەرگىسى كەلمەيتىن اسكەري دارىگەرلەردىڭ قاجەت ەكەنىن كورسەتتى.
زاڭناماعا اسكەري كافەدرانى بىتىرۋشىلەردى اسكەري قىزمەت وتكەرۋدى مىندەتتەۋ بويىنشا تۇزەتۋلەر ەنگىزۋ تاپسىرىلدى.
«بارلىق ستۋدەنتتەر مەن جوعارى وقۋ ورىندارىنىڭ باسشىلارى اسكەري كافەدرادانىڭ – زاپاستاعى وفيتسەردىڭ اسكەري بيلەتىن الۋ ءتاسىلى ەمەس, ەڭ الدىمەن ەل مۇددەسى ءۇشىن قارۋلى كۇشتەردە قىزمەت ەتۋگە دايىن بولۋ ەكەنىن ءتۇسىنۋى ءتيىس», دەپ اتاپ ءوتتى قورعانىس ءمينيسترى.