اتىراۋ وبلىسىنداعى قارجى پوليتسەيلەرى توتەنشە جاعدايلار مينيسترلىگى باتىس وڭىرلىك اەروموبيلدى جەدەل قۇتقارۋ جاساعىنىڭ باسشىسى امانتاي ەربوزوۆتى پارا الىپ جاتقان جەرىنەن ۇستادى. بۇل تۋرالى «قازاقستان» تەلەارناسى حابارلادى.
ول قاراماعىنداعى ەكى ازاماتقا قىزمەتتەرىڭدى وسىرەمىن دەپ ولاردان پارا العان كورىنەدى. سونداي-اق قىزمەتكەرلەرىنە قىسىم كورسەتىپ, سىياقىعا بولىنگەن قارجىنىڭ تەڭ جارتىسىن جاسىرعان. تەكسەرىس جۇمىستارىن جۇرگىزگەن قارجى پوليتسياسىنىڭ قىزمەتكەرلەرى مەكەمە باسشىسىنىڭ مەملەكەت مۇلكىن ءوز پايداسىنا جاراتىپ كەلگەنىن انىقتادى. ناقتى ايتقاندا, ول ءىس-ساپارلارعا قاتىستى بيلەتتى ۇشاققا الىندى دەپ تولتىرتىپ, ءوزى پويىزبەن جۇرگەن. ال ارتىلعان قاراجاتتى جەكە قاجەتتىلىگىنە جاراتقان ەكەن. مۇنان وزگە, مەكەمەگە بولىنگەن جانار-جاعارماي مەن اۆتوكولىك بولشەكتەرىنە دە سۇق قولىن سۇقتى دەپ ايىپتالۋدا. ەستەرىڭىزگە سالا كەتەيىك, باتىس وڭىرلىك اەروموبيلدى جەدەل قۇتقارۋ جاساعى اتىراۋ, باتىس قازاقستان, اقتوبە جانە ماڭعىستاۋ وبلىستارىنا قىزمەت كورسەتەدى.
«باتىس وڭىرلىك اەروموبيلدى جەدەل قۇتقارۋ جاساعى باسشىسىنا قاتىستى پارا الدى دەگەن كۇدىكپەن قىلمىستىق كودەكستىڭ 311-بابىنىڭ 4-بولىگى بويىنشا ەكى قىلمىستىق ءىس قوزعالدى. كۇدىكتىگە 7 جىلدان 12 جىلعا دەيىن باس بوستاندىعىنان ايىرۋ جانە دۇنيە مۇلكىن تاركىلەۋ جازاسى تاعايىندالۋى مۇمكىن», - دەيدى وبلىستىق ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتى باسشىسىنىڭ ورىنباسارى زاڭعار زاڭقانوۆ.
باقىتبەك كەنەش ۇلى.
دەرەككوز: «قازاقستان» تەلەارناسى
فوتو: «قازاقستان» تەلەارناسى.