18 قاڭتار كۇنى ازەربايجاننىڭ باكۋ قالاسىندا «Astana arlans» جارتىلاي كاسىپقوي كلۋبى بۇكىلالەمدىك بوكس سەرياسى جارىسىنىڭ اياسىندا جەرگىلىكتى «Baku Fires» كومانداسىمەن كەزەكتى كەزدەسۋىن وتكىزەدى. بۇل تۋرالى egemen.kz ءتىلشىسى حابارلادى.
بۇل كوماندالاردىڭ بيىلعى ماۋسىمداعى ەكىنشى كەزدەسۋى. بىلتىر 15 قاراشا كۇنى كوماندالار الماتىدا العاشقى كەزدەسۋلەرىن وتكىزىپ, وندا «استانا ارلانس» قارسىلاستارىن 4:1 ەسەبىمەن جەڭگەن بولاتىن. سول كەزدە 49, 56, 64, 75 جانە 91 كيلو سالماقتاعى بوكسشىلار كۇش سىناسقانى بەلگىلى. ەندى, مىنە كوماندالار تاعى دا كەزدەسىپ, ارالارىنداعى مىقتىنى تاعى دا انىقتايتىن بولادى. بۇل كەزدەسۋ ەندى باسقا سالماقتار بويىنشا وتەدى. وندا 52, 60, 69, 81 جانە 91 كيلودان اسا سالماق دارەجەسىندەگى بوكسشىلار قولعاپ تۇيىستىرەدى.
«ارلانداردىڭ» باس جاتتىقتىرۋشىسى سەرگەي كورچينسكي بۇل جەكپە-جەككە ءىلياس سۇلەيمەنوۆ (52 كگ), سامات باشەنوۆ (60 كگ), مەيىرىم نۇرسۇلتانوۆ (69 كگ), ەحسان روۋزباحاني (81 كگ) مەن اسا اۋىر سالماقتاعى رۋسلان مىرساتاەۆتى شارشى الاڭعا شىعاراتىنىن مالىمدەدى. وسى كۇنى «استانا ارلانستىڭ» ساپىنا جاقىندا عانا قوسىلعان 52 كيلوداعى ىلياس سۇيلەمەنوۆ WSB سەرياسىنداعى العاشقى جەكپە-جەگىن وتكىزەدى.
داستان كەنجالين.
دەرەككوز: http://astanaarlans.kz/