كەشە ورتالىق كوممۋنيكاتسيالار قىزمەتىندە ەۋرازيالىق بيزنەس-فورۋمعا جانە كاسىپكەرلىكتىڭ دامۋىنا ارنالعان ءباسپاسوز ءماسليحاتى بولدى. وندا شارانى ۇيىمداستىرۋ كوميتەتىنىڭ توراعاسى قۋانىش ءداۋىتوۆ اتالعان فورۋم 17-18 ساۋىردە الماتى قالاسىندا وتەتىندىگىن مالىمدەدى.
كەشە ورتالىق كوممۋنيكاتسيالار قىزمەتىندە ەۋرازيالىق بيزنەس-فورۋمعا جانە كاسىپكەرلىكتىڭ دامۋىنا ارنالعان ءباسپاسوز ءماسليحاتى بولدى. وندا شارانى ۇيىمداستىرۋ كوميتەتىنىڭ توراعاسى قۋانىش ءداۋىتوۆ اتالعان فورۋم 17-18 ساۋىردە الماتى قالاسىندا وتەتىندىگىن مالىمدەدى.
بريفينگكە ءماجىلىس دەپۋتاتى جانە «نۇر وتان» پارتياسىنىڭ كاسىپكەرلىكتى دامىتۋ ماسەلەلەرى جونىندەگى ۇيلەستىرۋشىسى ا.سولوۆەۆا, قازاقستاننىڭ ۇلتتىق كاسىپكەرلەر پالاتاسى باسقارما ءتوراعاسىنىڭ ورىنباسارى ر.وشاقباەۆ, «عالىمداردىڭ ەۋرازيالىق ەكونوميكالىق كلۋبى» قاۋىمداستىعىنىڭ ۆيتسە-پرەزيدەنتى م.كۋربەنوۆ جانە ەۋرازيالىق بيزنەس-فورۋمنىڭ ۇيىمداستىرۋ كوميتەتىنىڭ توراعاسى ق.ءداۋىتوۆ قاتىستى.
قازاقستاندا 1,5 ميلليون شاعىن جانە ورتا كاسىپكەرلىك سۋبەكتىلەرى تىركەلگەن. قازىرگى تاڭدا ونىڭ 850 مىڭى بەلسەندى جۇمىس ىستەپ تۇر. حالقىمىزدىڭ بەلگىلى بولىگى, اتاپ ايتقاندا, ەڭبەككە قابىلەتتى 2 ميلليوننان استام ازامات وسى سالادا قىزمەت ەتەدى, دەدى ورتالىق كوممۋنيكاتسيالار قىزمەتىنىڭ رەسمي وكىلى ا.ابيبۋللاەۆ كىرىسپە سوزىندە. ءسويتىپ, مەملەكەتتىك ساياسات پەن ۇلتتىق باسەكەگە قابىلەتتىلىكتى نىعايتۋدا كاسىپكەرلىكتىڭ ءرولى ءوسىپ كەلە جاتقانىن ايتتى. دەمەك, كاسىپكەرلىكتى قولداۋ – كۇن تارتىبىندە.
– پارتيا ءوزىنىڭ سايلاۋالدى تۇعىرناماسىندا شاعىن جانە ورتا بيزنەستى دامىتۋ بويىنشا ناقتى مىندەتتەر الدى. پارتيادا كۋراتورلىق ينستيتۋتى قۇرىلدى. بۇل بىرنەشە باعىتتى قاراستىراتىن جاڭا ينستيتۋت. تۇعىرناما ءمىندەتتەرىن ءبىز ينديكاتورلار جۇيەسى ارقىلى باعالايتىن بولامىز. اتاپ ايتقاندا, وسىنداي ينديكاتورلاردىڭ 3 دەڭگەيىن بەلگىلەدىك. ولاردىڭ بىرەۋى جاھاندىق سيپاتقا يە. بۇل الەمدىك قاۋىمداستىقتا جانە ۇلتتىق دەڭگەيدە قابىلدانعان ولشەم – ىشكى جالپى ءونىمنىڭ قۇرىلىمىندا شاعىن جانە ورتا بيزنەس ۇلەسىنىڭ قانداي بولاتىندىعى. ول ينديكاتور, بيزنەس ءوزىنىڭ لايىقتى ورنىن الۋى ءۇشىن وعان قانداي جاعداي جاساعانىمىزدىڭ كورسەتكىشى ىسپەتتى. ەكىنشى, اعىمداعى ينديكاتورلار. ءبىزدىڭ ەلىمىزدە قازىر قولدانىلىپ جۇرگەن باعدارلامالاردى تۇزەتىپ, جاڭا ۇسىنىستار ەنگىزۋگە ءمۇمكىندىك بەرەدى. ءۇشىنشى, كىرىكتىرىلگەن ينديكاتور. ول ارقىلى بيزنەستىڭ قانشالىقتى بەلسەندى دامىپ جاتقانىن بىلۋگە بولادى, – دەدى دەپۋتات ا.سولوۆەۆا.
ءباسپاسوز ءماسليحاتى بارىسىندا «عالىمداردىڭ ەۋرازيالىق ەكونوميكالىق كلۋبى» قاۋىمداستىعىنىڭ ۆيتسە-پرەزيدەنتى م.كۋربەنوۆ پەن ەۋرازيالىق بيزنەس-فورۋمنىڭ ۇيىمداستىرۋ كوميتەتىنىڭ توراعاسى ق.ءداۋىتوۆ ءوزارا كەلىسىم مەموراندۋمىنا قول قويدى. ودان كەيىن تاراپتار ەكى ۇيىمنىڭ بىرلەسە وتىرىپ اتقاراتىن جۇمىستارى تۋرالى ايتتى. ەلدەگى شاعىن جانە ورتا كاسىپكەرلىكتى دامىتۋ ماسەلەلەرىنە توقتالدى.
– ەۋرازيالىق بيزنەس-فورۋمعا دايىندىق جۇمىستارى بەس ايدان بەرى جۇرگىزىلۋدە. بۇگىندە قازاقستانداعى بيزنەس ەۋرازيالىق ەكونوميكالىق وداققا كىرۋدىڭ بارلىق مۇمكىندىكتەرىن تولىق باعالاپ ۇلگەرگەن جوق. سوندىقتان, فورۋمدا وسى جانە وزگە دە ءماسەلەلەردى تالقىلاپ, كاسىپكەرلەرگە پايداسى بولاتىن ءتۇرلى شارالاردى قاراستىرۋ جوسپارلانىپ وتىر. قازاقستاننىڭ جانە كەدەن وداعى ەلدەرىنىڭ باسشىلارىنا شاقىرتۋ حاتىن جولدادىق, – دەدى ق.ءداۋىتوۆ.
اتالعان بيزنەس فورۋم 17-18 ساۋىردە الماتى قالاسىندا وتەدى. سەبەبى, ەلىمىزدەگى كاسىپكەرلەردىڭ باسىم بولىگى وسى قالادا شوعىرلانعان, دەيدى ۇيىمداستىرۋشىلار. وسى جيىندا قارالعان ماسەلەلەر مامىر ايىندا وتەتىن استانا ەكونوميكالىق فورۋمى اياسىندا جالعاسىن تابادى.
نۇرباي ەلمۇراتوۆ,
«ەگەمەن قازاقستان».