اتىراۋ وبلىسى اكىمىنىڭ وكىمىمەن نۇرلان جانتوقوۆ وبلىستىق تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى بولىپ تاعايىندالدى, دەپ حابارلايدى Egemen.kz.
نۇرلان قويلان ۇلى 1963 جىلى اتىراۋ وبلىسىنىڭ قىزىلقوعا اۋدانىندا دۇنيەگە كەلگەن. لەنين اتىنداعى قازاق پوليتەحنيكالىق ينستيتۋتىن تاۋ-كەن ينجەنەرى, اتىراۋ ينجەنەرلىك-گۋمانيتارلىق ينستيتۋتىن ەكونوميست ماماندىعىمەن بىتىرگەن.
ەڭبەك جولىن 1981 جىلى ماقات اۋدانىنداعى باسپاحانادا باستادى. جوعارى ءبىلىم العان سوڭ 1989-1992 جىلدارى «ەمبىمۇنايگەوفيزيكا» وندىرىستىك فيليالىندا جۇمىس ىستەدى. كەيىن كاسىپكەرلىكپەن اينالىستى.
1994 جىلى مەملەكەتتىك قىزمەتكە اۋىسىپ, حالىقتى جۇمىسپەن قامتۋ سالاسىندا ءتۇرلى لاۋازىمداردى اتقاردى. 1999-2003 جىلدارى ماقات اۋدانى اكىمىنىڭ ورىنباسارى, 2003-2007 جىلدارى ماقات اۋداننىڭ اكىمى بولدى. 2007-2010 جىلدارى اتىراۋ وبلىستىق اۋىل شارۋاشىلىعى باسقارماسىن باسقاردى.
ال, 2010-2021 جىلدارى ءتۇرلى كاسىپورىن مەن كومپانياعا باسشىلىق ەتتى. بيىلعى ساۋىردەن بەرى ماحامبەت اۋداندىق ورمان جانە جانۋارلار دۇنيەسىن قورعاۋ بولىمىندە ەكولوگ بولعان.
«قۇرمەت» وردەنىمەن, II دارەجەلى «ەڭبەك داڭقى» بەلگىسىمەن جانە مەرەيتويلىق مەدالدارمەن ماراپاتتالعان.