قوستاناي وبلىسىندا پوليتسەيلەر 5-12 شىلدە ارالىعىندا «زاڭسىز ميگرانت-2021» جەدەل الدىن الۋ شاراسىن وتكىزدى. ءبىر اپتا ىشىندە كوپتەگەن زاڭبۇزۋشىلىق فاكتىسى انىقتالدى, دەپ حابارلايدى Egemen.kz.
پوليتسيا دەپارتامەنتىنىڭ ايتۋىنشا, اتالعان شارانى وتكىزۋگە ءموبيلدى توپتار ۇيىمداستىرىلدى. ولار بازارلاردا, سالىنىپ جاتقان نىسانداردا, شارۋا قوجالىقتارىندا, شەتەلدىك ازاماتتاردىڭ ۋاقىتشا بولۋ ورىندارىندا رەيدتەر جۇرگىزگەن.
«كوشى-قون زاڭناماسىن بۇزعانى ءۇشىن 181 شەتەلدىك ازامات, ونىڭ ىشىندە 30-ى ەڭبەك قىزمەتىن زاڭسىز جۇرگىزگەنى ءۇشىن, 140-ى بەلگىلەنگەن مەرزىمدە كەتۋدەن جالتارعانى ءۇشىن اكىمشىلىك جاۋاپقا تارتىلدى. اتالعان تۇلعالارعا قاتىستى اكىمشىلىك ىقپال ەتۋ شارالارى قولدانىلدى. قوستاناي وبلىسىنىڭ سوتتارى 9 شەتەلدىكتى ەلدەن شىعارۋ تۋرالى شەشىم شىعاردى», دەپ ءتۇسىندىردى پوليتسيادا.
سونداي-اق 106 شەتەلدىك ازاماتتىڭ ۋاقىتشا بولۋ مەرزىمى قىسقارتىلدى. قازاقستاننىڭ 108 ازاماتى شەتەلدىكتەردىڭ كەلۋى تۋرالى ىشكى ىستەر ورگاندارىن ۋاقتىلى حاباردار ەتپەگەنى ءۇشىن اكىمشىلىك جاۋاپقا تارتىلدى.
«پوليتسيا دەپارتامەنتى «حالىقتىڭ كوشى-قونى تۋرالى» قر زاڭىنىڭ بابىنا سايكەس قابىلداۋشى تۇلعالار وزدەرىنە كەلەتىن يمميگرانتتار تۋرالى ىشكى ىستەر ورگاندارىن ولار كەلگەن كۇننەن باستاپ ءۇش جۇمىس كۇنى ىشىندە حاباردار ەتۋگە مىندەتتى. «قر قك 394-بابى («زاڭسىز كوشى-قوندى ۇيىمداستىرۋ») بويىنشا 4 قىلمىستىق ءىس تىركەلدى, قازىرگى ۋاقىتتا تەرگەۋ امالدارى جۇرگىزىلۋدە.
وسى باپتىڭ سانكتسياسى ەكى مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋدى, قوعامدىق جۇمىستارعا تارتۋدى نەمەسە ەكى جىلعا دەيىن باس بوستاندىعىن شەكتەۋدى كوزدەيدى», دەدى ۆەدومستۆودا.