113 قازاقستاندىق «بولاشاق» حالىقارالىق ستيپەندياسىنىڭ يەگەرى اتاندى. شەشىم قر مەملەكەتتىك حاتشىسى قىرىمبەك كوشەرباەۆتىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسىندا قابىلداندى, دەپ حابارلايدى Egemen.kz قر بعم ءباسپاسوز قىزمەتىنە سىلتەمە جاساپ.
كونكۋرستىق ىرىكتەۋدەن وتكەن ستيپەندياتتار ەندى ماگيستراتۋرا مەن دوكتورانتۋرادا وقيدى نەمەسە الەمنىڭ جەتەكشى جوعارى وقۋ ورىندارىندا قازاقستاندا سۇرانىسقا يە ماماندىقتار بويىنشا تاعىلىمدامادان وتەتىن بولادى.
ستيپەنديالار مەديتسينا, جاراتىلىستانۋ جانە الەۋمەتتىك عىلىمدار, ءبىلىم بەرۋ, يننوۆاتسيالار مەن جاڭا تەحنولوگيالار, كرەاتيۆتى يندۋستريا, سونداي-اق يندۋستريالىق ينجەنەريا باعىتتارى بويىنشا بولىنگەن. 2021 جىلى «بولاشاق» باعدارلاماسى بويىنشا وقۋعا بارلىعى 1055 ستيپەنديا ءبولىندى, ونىڭ ىشىندە 555 ستيپەنديا ماگيستراتۋرا, رەزيدەنتۋرا, دوكتورانتۋرا باعدارلامالارى بويىنشا بەرىلدى. سونىمەن قاتار بيىل العاش رەت «عالىمدار» تاعىلىمداماسىنىڭ جاڭا ساناتى بويىنشا 500 ستيپەنديا ءبولىندى. اتالعان سانات مەملەكەت باسشىسى ق.توقاەۆتىڭ تاپسىرماسى بويىنشا قۇرىلدى.
«بۇل شىن مانىندە بۇرىن-سوڭدى بولماعان شارا. ەندى جىل سايىن ەلىمىزدىڭ 500 عالىمى الەمنىڭ جەتەكشى عىلىمي ورتالىقتارىندا تاعىلىمدامادان ءوتىپ, سونىڭ ىشىندە وسى ورتالىقتاردىڭ زەرتحانالارىندا بىرلەسكەن زەرتتەۋلەر جۇرگىزە الادى. ءبىز عالىمدارىمىزدى بەلسەندىلىك تانىتىپ, شاكىرتاقى تاعايىنداۋعا قاتىسۋعا شاقىرامىز», دەدى ءبىلىم جانە عىلىم ۆيتسە-ءمينيسترى قۋانىش ەرعاليەۆ.
ەستەرىڭىزگە سالا كەتەيىك, «بولاشاق» حالىقارالىق ستيپەندياسىن تاعايىنداۋ كونكۋرسىنا قاتىسۋ ءۇشىن قۇجاتتاردى قابىلداۋ 4 مامىردان باستالىپ, 28 قازانعا دەيىن جالعاسادى.