ماۋسىم ايىندا ەلەكتروندىق ەڭبەك بيرجاسىندا 96,4 مىڭ بوس جۇمىس ورنى جانە 49,2 مىڭ تۇيىندەمە ورنالاستىرىلعان. بۇل تۋرالى «ەڭبەك رەسۋرستارىن دامىتۋ ورتالىعى» اق حابارلادى, دەپ جازادى Egemen.kz.
وتكەن ايمەن سالىستىرعاندا ەەب-داعى بوس جۇمىس ورىندارىنىڭ سانى 28%-عا, ال تۇيىندەمەلەر سانى 6%-عا ءوستى. بوس جۇمىس ورىندارىنىڭ سانى ەلدىڭ وڭتۇستىك وبلىستارىندا كوبىرەك اشىلدى.
بوس ورىنداردىڭ ۇشتەن ءبىر بولىگى تومەن بىلىكتىلىكتى تالاپ ەتەتىن كاسىپتەرگە جاتادى. سۇرانىس بويىنشا ەكىنشى ورىندا – ونەركاسىپ جۇمىسشىلار, ءۇشىنشى ورىندا – كاسىبي ماماندار.
سالا بويىنشا جىكتەيتىن بولساق, ماۋسىم ايىندا اۋىل شارۋاشىلىعى جانە قۇرىلىس سالالارى جانە وزگە دە قىزمەتتەر سۇرانىسقا يە ۇشتىكتى قۇرادى. وسى ءۇش سالا بويىنشا ءبىر اي ىشىندە 20 مىڭنان استام بوس جۇمىس ورنىن جاريالانعان.
ورتالىقتىڭ جازۋىنشا, بىلىكتى ەمەس جۇمىسشىلاردىڭ ەڭبەكاقىسى 7,9 مىڭعا, ونەركاسىپ جۇمىسشىلارىنىكى - 3,9 مىڭعا, قىزمەت كورسەتۋ جانە ساتۋ سالاسىنداعى قىزمەتكەرلەردىكى 2,9 مىڭعا وسكەن.
اتاپ ايتقاندا, بىلىكتىلىكتىڭ بولۋىن تالاپ ەتپەيتىن كاسىپتەر اراسىندا ءبىر اي ىشىندە قوسالقى جۇمىسشىلارعا, كوگالداندىرۋ جونىندەگى جۇمىسشىلارعا, ءارتۇرلى جۇمىستاردى ورىنداۋمەن اينالىساتىن جۇمىسشىلارعا سۇرانىس ارتتى, ويتكەنى اۋىل شارۋاشىلىعى مەن قۇرىلىستا ماۋسىمدىق جۇمىستار جانداندى.
ونەركاسىپ جۇمىسشىلارى اراسىندا تىگىنشىلەر, سلەسار-جوندەۋشىلەر, اۆتوسلەسارلار جانە ەلەكترومونتەرلارعا سۇرانىس كوبىرەك ءوستى.
قىزمەت كورسەتۋ جانە ساتۋ سالاسىنداعى قىزمەتكەرلەر اراسىندا كۇزەتشىلەرگە, اسپازدارعا جانە تاربيەشى كومەكشىلەرىنە سۇرانىس ارتتى.
جەكەلەگەن بىلىكتى ماماندىقتاردى قاراستىرا وتىرىپ, ماۋسىم ايىندا كونسۋلتانت-ساتۋشى (323 تۇيىندەمە جانە 1581 بوس جۇمىس ورنى), اۆتوموبيل جۇرگىزۋشىسى (872 تۇيىندەمە جانە 1854 بوس جۇمىس ورنى) جەتىسپەيتىنىن اتاپ وتكەن ءجون.
مەيىربيكەلەرگە/مەيىرگەرلەرگە دەگەن سۇرانىس تا جوعارى (628 تۇيىندەمە جانە 1249 بوس جۇمىس ورنى).
بىلىكتىلىگى جوق قىزمەتكەرلەردىڭ اراسىندا جۇك تيەۋشىلەر, قوسالقى جۇمىسشىلار, ءتۇرلى جۇمىستاردى ورىنداۋمەن اينالىساتىن ادامدار, اس ءۇي جۇمىسشىلارى جەتىسپەيدى.
ماۋسىم ايىندا ەڭ تاپشى ماماندىقتار قاتارىنا بىلىكتىلىگى جوق قۇرىلىس جۇمىسشىلارى مەن فەرما شارۋاشىلىعىنداعى ءتۇرلى جۇمىستاردى ورىنداۋمەن اينالىساتىن جۇمىسشىلار قوسىلدى.
ال ماۋسىم ايىندا ارتىق دەپ تابىلعان ماماندار ىشىندە مال وسىرۋشىلەر, زاڭگەرلەر, فيرما ديرەكتورلارى جانە تەحنيك-باعدارلاماشىلار, ەلدى مەكەندەردى اباتتاندىرۋ بويىنشا جۇمىسشىلار, ۆاحتەرلەر مەن كونسەرجدەر, كۋرەرلەر, سونداي-اق اۋماقتاردى اباتتاندىرۋ بويىنشا جۇمىسشىلار كىردى.