قازاقستان پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى ازيا-تىنىق مۇحيت ءوڭىرىنىڭ جوعارعى دەڭگەيدەگى حالىقارالىق بەينەكونفەرەنتسياسىنا قاتىستى, دەپ حابارلايدى Egemen.kz.
اتالعان ءىس-شارا قىتاي تاراپىنىڭ باستاماسىمەن ء«بىر بەلدەۋ, ءبىر جول» باعدارلاماسى شەڭبەرىندە ءوتتى. «تۇراقتى قالىپقا كەلۋ ماقساتىندا COVID-19 ىندەتىمەن كۇرەستە قولعابىس كورسەتۋ» - فورۋمنىڭ نەگىزگى تاقىرىبى بولدى.
م.تىلەۋبەردى ءوز سوزىندە دەنساۋلىق ساقتاۋدى تسيفرلاندىرۋ سالاسىندا ىنتىماقتاستىقتى ورناتۋ, COVID-19 ىندەتىنە قارسى ەكپەلەرگە قول جەتىمدىلىكتى جانە ولاردىڭ ءادىل ءبولىنۋىن قامتاماسىز ەتۋ, سونداي-اق ازيا-تىنىق مۇحيت ءوڭىرىنىڭ مۇشە-مەملەكەتتەرىمەن كوروناۆيرۋستىق ينفەكتسياسىمەن كۇرەسۋ بويىنشا ىنتىماقتاستىقتىڭ پراكتيكالىق تەتىكتەرىن كۇرۋ بويىنشا قازاقستاندىق باستامالارىن اتاپ ءوتتى. سونىمەن قاتار ول ەلىمىزدىڭ بۇۇ-نىڭ ەكولوگيالىق كۇن تارتىبىنە ماڭىزدى ءمان بەرەتىندىگىنە جانە ەكونوميكانى كوگالداندىرۋ جونىندە جۇمىستى جالعاستىرۋعا دايىن ەكەندىگىنە نازار اۋداردى.
بەينەكونفەرەنتسياعا ازيا-تىنىق مۇحيت ءوڭىرى, لاتىن امەريكا, ورتالىق ازيا مەملەكەتتەرىنىڭ سىرتقى ساياسي ۆەدومستۆولارىنىڭ جانە حالىقارالىق ۇيىمداردىڭ باسشىلارى قاتىستى. ىندەتپەن كۇرەسۋ باعىتىندا قارىم-قاتىناستاردىڭ بولاشاق جولدارى تالقىلاندى جانە ىندەت داۋىرىندە كەيىنگى جاھاندىق ەكونوميكانى قالپىنا كەلتىرۋ بويىنشا پىكىر الماسۋ ءوتتى.
جاسىل ەكونوميكا مەن ينۆەستيتسيالار سالاسىنداعى ىنتىماقتاستىقتىڭ بولاشاعىنا جانە وزەكتى ەكولوگيالىق ماسەلەلەردىڭ شەشىلۋىنە اسا كوڭىل ءبولىندى.