كوركەم گيمناستيكادان تاشكەنتتە ءوتىپ جاتقان ليتسەنزيالىق ازيا چەمپيوناتىندا الينا ءادىلحانوۆا جەڭىمپاز اتانىپ, توكيو وليمپياداسىنا جولداما جەڭىپ الدى, دەپ حابارلايدى Egemen.kz.
ۇلتتىق وليمپيادا كوميتەتىنىڭ ءباسپاسوز قىزمەتىنىڭ حابارلاۋىنشا, الينا ءادىلحانوۆا كوپسايىس قورىتىندىسى بويىنشا 95.15 ۇپاي جيناپ, جەڭىسكە جەتتى. ەكىنشى جانە ءۇشىنشى ورىندى وزبەكستاندىقتار تاحمينا يكروموۆا (92.90) مەن ەكاتەرينا فەتيسوۆا (90.85) يەلەنگەن.
قازاقستان اتىنان سىنعا تۇسكەن تاعى ءبىر سپورتشى اديليا تىلەكەنوۆا جەتىنشى ورىنعا تابان تىرەدى. ليتسەنزيالىق ازيا بىرىنشىلىگى 6 ماۋسىمدا باستالعان بولاتىن. جارىس ەرەجەسى بويىنشا تەك جەڭىمپاز اتانعان سپورتشىعا وليمپيادا جولداماسى تابىستالادى.
الينا ءادىلحانوۆا 2018 جىلعى ازيا ويىندارىنىڭ چەمپيونى. شىمكەنت قالالىق № 9 كوركەم گيمناستيكا سپورت مەكتەبىنىڭ شاكىرتى. بۇگىندە قر ەڭبەگى سىڭگەن جاتتىقتىرۋشى ءاليا يۋسۋپوۆادان ءتالىم الادى.