الماتىدا حالىقارالىق اقپاراتتىق تەحنولوگيالار ۋنيۆەرسيتەتىنىڭ بۇرىنعى رەكتورى دامير شىنىبەكوۆ پەن باس ەسەپشى سپابەكوۆا قارجىنى تالان-تاراجعا سالعان ءۇشىن سوتتالدى, دەپ حابارلايدى Egemen.kz.
«سوتتالۋشى شىنىبەكوۆ پەن سپابەكوۆانىڭ كىنالارى تولىق دالەلدەندى. سوت شىنىبەكوۆتى قىلمىس جاساعانى ءۇشىن كىنالى دەپ تانىپ, مۇلكىن تاركىلەۋمەن بىرگە, 8 جىلعا باس بوستاندىعىنان ايىرۋ جازاسىن بەلگىلەدى», دەدى الماتى قالالىق №2 بوستاندىق اۋدانى سوتىنىڭ سۋدياسى تەمىرجان قۇداباەۆ.
وقۋ ورنىنىڭ بۇرىنعى باس ەسەپشىسى جانايىم سپابەكوۆانىڭ دا مۇلكى تاركىلەنىپ, 8 جىلعا باس بوستاندىعىنان ايىرىلدى.
سۋديا ۇكىمدى وقىعان سوڭ بارلىق دالەلدەردىڭ مۇقيات زەرتتەلگەنىن اتاپ ءوتتى.
ەستەرىڭىزگە سالا كەتەيىك, وتكەن جىلى حالىقارالىق اقپاراتتىق تەحنولوگيالار ۋنيۆەرسيتەتىنىڭ بۇرىنعى رەكتورى دامير شىنىبەكوۆ قارجىنى يەمدەنۋ نەمەسە تالان-تاراجعا سالۋ كۇدىگى بويىنشا قاماۋعا الىنعان ەدى.