توعىز جولدىڭ تورابىنداعى جاڭعىزتوبە كەنتىنە ورناتىلعان كەنەسارى حاننىڭ ءمۇسىنى كوپتىڭ كوڭىلىنەن شىقتى.
ارينە, سىني پىكىرلەر دە ايتىلدى. دەي تۇرعانمەن, تۇعىرعا قونعان حان كەنەنى شاعىن اۋىلدىڭ تورىنەن كورەمىز دەپ ويلاماعان ەدىك.
بىلتىر جاڭعىزتوبە كەنتىندەگى بوس تۇرعان الاڭعا ساياباق سالىنعان. ساياباقتىڭ وڭ جاق قاپتالى سپورتتىق الاڭ بولسا, ءتور جاعىنا كىشىگىرىم ساحنا قويىلعان. ەلدەگى ىندەتتىڭ بەتى قايتىپ, قالىپتى ومىرگە ورالعان سوڭ اۋىلداعى كەيبىر مەرەكەلىك شارالار, سپورتتىق جارىستار وسىندا وتەدى. ال باقتىڭ تورىندە جەرگىلىكتى قاۋىمداستىق مۇشەلەرىنىڭ ۇسىنىسىمەن قازاقتىڭ سوڭعى حانى كەنەسارىنىڭ ءمۇسىنى مەنمۇندالادى. تاقتا وتىرعان حاننىڭ ايبارلى, سۇستى ءمۇسىنى دەمەۋشىلەردىڭ كومەگىمەن جاسالدى. اۆتورى سەمەيدەگى «تولى» جشس جەتەكشىسى ماۋكەن وتەجان ەكەن.
كەنەسارى قاسىم ۇلى 1837 جىلى ءۇش ءجۇزدىڭ باسىن قوسىپ, ۇلت-ازاتتىق كوتەرىلىسىن جاساعانى تاريحتان ايان. ول بالا كەزىنەن-اق ات قۇلاعىندا وينادى, قۇرالايدى كوزگە اتقان مەرگەن بولدى. قارا قىلدى قاق جارعان ادىلدىگىمەن, جۇرەك جۇتقان باتىلدىعىمەن, قايسارلىعىمەن تaنىلدى. تاريحتاعى دەرەكتەرگە سۇيەنسەك, حان كەنە ورتا بويلى, تورتپاق تۇلعالى ادام بولعان ەكەن. از سويلەپ, كوپ تىڭداپتى. ءوزىن ءوزى اسا بايسالدى ۇستاعان دەسەدى. راس, قازاقتىڭ ازاتتىعى ءۇشىن كۇرەسكەن باتىر بابامىزدىڭ اتىنا كوشە بەرىپ, ەسكەرتكىشىن قويىپ جاتساق ارتىقتىق ەتپەيدى. كەرىسىنشە, ءوسىپ كەلە جاتقان ۇرپاق ءۇشىن تاربيە ەمەس پە؟!