قازاقستاندا وتاندىق فارماتسەۆتيكا ءوندىرىسىن دامىتۋعا باعىتتالعان ءىرى جوبالاردىڭ ءبىرى جۇزەگە اسادى. ۇكىمەت الماتى وبلىسىندا قۇنى 32,5 ملرد تەڭگە بولاتىن بيوفارماتسەۆتيكالىق زاۋىت سالۋ جوباسىن ماقۇلدادى, دەپ حابارلايدى Egemen.kz.
جوبا الماتى وبلىسىنداعى «الاتاۋ» ارنايى ەكونوميكالىق ايماعىندا ىسكە اسادى. وسىعان بايلانىستى پرەمەر-مينيستر ولجاس بەكتەنوۆ دەنساۋلىق ساقتاۋ مينيسترلىگى مەن «Steppe pharmaceuticals» جشس اراسىنداعى ينۆەستيتسيالىق كەلىسىمدى بەكىتەتىن قاۋلىعا قول قويدى.
جاڭا كەشەن تولىق تسيكلدى فارماتسەۆتيكالىق ءوندىرىس رەتىندە جۇمىس ىستەمەك. كاسىپورىندا 20 ءتۇرلى دارىلىك پرەپارات شىعارۋ جوسپارلانعان. ونىڭ ىشىندە ونكولوگيالىق جانە سيرەك كەزدەسەتىن اۋرۋلاردى ەمدەۋگە ارنالعان دارىلەر, سونداي-اق زاماناۋي يممۋنوبيولوگيالىق پرەپاراتتار بار.
2027 جىلدان باستاپ ەل تۇرعىندارى وزدەرىنە قاجەتتى ءدارى-دارمەكتى تەگىن الادى
جوبانى ىسكە قوسۋ 2031 جىلعا جوسپارلانعان. ال ءوندىرىس تولىق قۋاتىنا 2032 جىلى شىعادى دەپ كۇتىلەدى. نەگىزگى باعىتتار بويىنشا تولىق وندىرىستىك تسيكلگە كوشۋ 2034 جىلعا دەيىن كەزەڭ-كەزەڭىمەن جۇزەگە اسادى.
كەشەن تەك ءدارى وندىرۋمەن شەكتەلمەيدى. مۇندا عىلىمي-زەرتتەۋ جانە تاجىريبەلىك-كونسترۋكتورلىق جۇمىستار دا جۇرگىزىلەدى. اتاپ ايتقاندا, بيوەكۆيۆالەنتتىلىك زەرتتەۋلەرى ۇيىمداستىرىلىپ, حالىقارالىق GMP ستاندارتتارى ەنگىزىلەدى. سونىمەن قاتار قازاقستاندىق مامانداردى دايارلاۋ جانە ولاردىڭ بىلىكتىلىگىن ارتتىرۋ جۇيەسى قۇرىلادى.
جوبا ناتيجەسىندە شامامەن 60 جاڭا جۇمىس ورنى اشىلادى. ۇكىمەت بۇل باستاما ەلدىڭ دارىلىك قاۋىپسىزدىگىن كۇشەيتىپ, يمپورتقا تاۋەلدىلىكتى ازايتۋعا مۇمكىندىك بەرەدى دەپ وتىر.
وتاندىق عالىمدار جۋسانعا اللەرگيانى ءبىر اپتادا ەمدەيتىن ءدارىنى ازىرلەدى
قازىر قازاقستاندا فارماتسەۆتيكا سالاسىندا سەگىز ءىرى ينۆەستيتسيالىق جوبا جۇزەگە اسىرىلىپ جاتىر. وتكەن جىلدىڭ قورىتىندىسى بويىنشا وتاندىق فارماتسەۆتيكالىق ءونىم ءوندىرىسى 191,1 ملرد تەڭگەگە جەتىپ, ءبىر جىلدا 8,7 پايىزعا وسكەن. ال سالاعا تارتىلعان ينۆەستيتسيا كولەمى 390 ملرد تەڭگەدەن استى.