بيىل ءساۋىر ايىنان باستاپ ەسىرتكى جەتكىزۋدىڭ 9 حالىقارالىق جانە 2 وڭىرلىك ارناسى جويىلدى, سونداي-اق ءبىر فيتوزەرتحانانىڭ قىزمەتى زالالسىزداندىرىلدى, دەپ حابارلايدى Egemen.kz.
اقتاۋ قالاسىنىڭ اۋەجايىندا جالپى سالماعى ءبىر كەلى بولاتىن 114 اپيىن كاپسۋلاسىن دەنەسىنە وراپ وتكىزبەك بولعان شەتەلدىك ازامات ۇستالدى.
ەلوردا اۋەجايىندا وڭتۇستىك ازيا ەلدەرىنىڭ بىرىنەن 12 كەلى گاشيش مايىن جەتكىزگەن كۇدىكتى ۇستالدى.
بۇدان بولەك, ءىرى كولەمدەگى «كوكنار ساباعىن» كونتراباندالىق جولمەن الىپ وتۋگە جانە تاراتۋعا, سونداي-اق اتالعان شيكىزاتتان ەسىرتكى قۇرالدارىن وندىرۋگە كۇدىكتى ادامداردىڭ تۇراقتى قىلمىستىق توبىنىڭ قۇقىققا قايشى ارەكەتىنىڭ جولى كەسىلدى.
بارلىعى 3,4 كەلى اپيىن, 9 كەلى گاشيش, 11,4 كەلى سينتەتيكالىق ەسىرتكى, 18,5 كەلى گاشيش مايى, 26,4 كەلى ماريحۋانا, 110 گرامم كوكاين جانە 20 توننا كوكنار سابانى, سونداي-اق 150 ليتردەن استام پرەكۋرسور تاركىلەندى.
اتالعان قۇقىقبۇزۋشىلىقتار بويىنشا ەلىمىزدىڭ 23 ازاماتى جانە 3 شەتەلدىك ۇستالدى.
قازىر سوتقا دەيىنگى تەرگەپ-تەكسەرۋ جۇرگىزىلىپ جاتىر. قىلمىستىق-پروتسەستىك كودەكستىڭ 201-بابىنا سايكەس وزگە اقپارات جاريا ەتۋگە جاتپايدى.