قازاقستان وڭىرلەرىندەگى ەپيدەميالىق احۋالدى باعالاۋ ماتريتساسى بويىنشا بىردە «قىزىل», بىردە «سارى» ايماقتاعى شىمكەنتتە كوروناۆيرۋس ىندەتىنىڭ تارالۋ دەڭگەيى سوڭعى تاۋلىكتەردە 100-دەن تۇسپەي تۇر. شىمكەنت قالاسىندا 14 مامىر كۇنى ىندەتتىڭ 102 جاعدايى تىركەلسە, جەكسەنبىدە بۇل كورسەتكىش ءبىر ادامعا عانا تومەندەدى.
قازىرگى تاڭعا مامانداندىرىلعان ينفەكتسيالىق ستاتسيونارلاردا بارلىعى 1 406 ورىن بار, توسەكتىك ورىن تولىمدىعى – 46%, 756 ورىن بوس. قالالىق دەنساۋلىق ساقتاۋ باسقارماسىنىڭ مالىمەتىنشە, ينفەكتسيالىق ستاتسيوناردا 650 ناۋقاستىڭ 320-سى كوروناۆيرۋستان, 325-ءسى پنەۆمونيادان ەمدەلۋدە.
ەگۋ ناۋقانى باستالعالى 160 مىڭنان استام ادام ۆاكتسينالانعان, ونىڭ 65 مىڭعا جۋىعى ۆاكتسينانىڭ ەكى كومپونەنتىن الدى. ءيا, ىندەتتەن ساقتانۋدىڭ باستى جولى ەكپە سالدىرۋ ەكەنى ماماندار تاراپىنان ۇنەمى ەسكەرتىلۋدە. سونىمەن قاتار ءۇشىنشى مەگاپوليستە ىندەتتىڭ تارالۋىنا قارسى شارالار كەڭىنەن قولدانىلۋدا. مىسالى, قالانىڭ باس سانيتار دارىگەرىنىڭ قاۋلىسىمەن شىمكەنتتە كارانتين رەجىمىن جانە كوروناۆيرۋس ينفەكتسياسى تارالۋىنىڭ الدىن الۋ جونىندەگى شەكتەۋ شارالارى 16 مامىردان باستاپ ەپيدەميالىق جاعداي تۇراقتالعانعا دەيىن ۇزارتىلدى.
سونداي-اق ءۇشىنشى مەگاپوليستە «Ashyq» جوباسى كەڭىنەن قولدانىلا باستادى. قالادا حالىققا قىزمەت كورسەتەتىن كاسىپكەرلىك نىساندار جوباعا ءساۋىردىڭ سوڭىندا وتكەن بولاتىن. بيزنەس ۇيىمدارىنىڭ كارانتين كەزىندە ۇزدىكسىز جۇمىس ىستەۋىنە جانە ادامداردىڭ COVID-19-عا بايلانىستى دارەجەسىن انىقتاۋعا مۇمكىندىك بەرەتىن جوباعا قاتىسۋعا ءۇشىنشى مەگاپوليستەگى كاسىپكەرلەردەن 848 ءوتىنىم ءتۇسىپ, ونىڭ ىشىندە 367-نە QR-كود بەرىلگەن, 192 نىسان اكىمدىك سايتىنا ورنالاستىرىلعان. ولاردىڭ قاتارىندا بىرنەشە فيتنەس-كلۋب, كينوتەاتر, سپا-ورتالىق, ساۋنا مەن باسقا دا نىساندار بار.
شىمكەنت