تۇركىستان وبلىسى ماقتاارال اۋدانىنىڭ قاريالارى اۋدان كولەمىندەگى بارلىق دۇكەندە ىشىمدىك اتاۋلىنىڭ ساتىلماعانىن قالايدى, دەپ حابارلايدى Egemen.kz.
مۇنداي ۇسىنىس-تىلەكتەرىن ولار اۋدان اكىمى باقىت اسانوۆتىڭ جەكە قابىلداۋىندا جەتكىزدى.
قوعامدىق قابىلداۋعا بىرنەشە اۋىلدىق وكرۋگتەن جينالىپ كەلگەن اقساقالدار سپيرتتىك ىشىمدىك ساتىلىمىنا توسقاۋىل قويۋعا ىقپال ەتۋ بويىنشا اۋدان اكىمىنە ءوتىنىش جاسادى. ال جاسۇزاق سىدىقوۆ بۇعان دەيىن ىشىمدىك ساتۋدى توقتاتقان ەلدى مەكەندەردىڭ تاجىريبەسى تۋرالى كەڭىنەن اڭگىمەلەپ ءوتتى. بۇل ەلدى مەكەندەردىڭ بارلىعىندا بەرەكە-بىرلىك سالتانات قۇرىپ, قىلمىس جاساۋ, جۇبايلاردىڭ اجىراسۋى, كىشى بۇزاقىلىق دەگەن اتىمەن جوعالعان. مۇنداي باستامانى ەڭ العاش ماقتاارال اۋدانىندا ەڭبەكشى اۋىلدىق وكرۋگىنە قاراستى جانتاقساي ەلدى مەكەنىنىڭ قاريالارى قولعا الىپتى. قابىلداۋعا كەلگەندەردىڭ ءبىرى, اۋداندىق قوعامدىق كەڭەستىڭ توراعاسى سەيىتكەرىم مەلدەحانوۆ ءوزى تۇراتىن بىرلىك اۋىلدىق وكرۋگى تابىستى اۋىلىندا دۇكەن يەلەرىنىڭ اربىرىمەن جەكە سويلەسىپ, سپيرتتىك ىشىمدىك ساتپاۋعا ۋادەلەرىن العانىن ايتتى. ال مانسۇرقوجا اقساقال اتاكەنت كەنتىندەگى 11 دۇكەن يەلەرىمەن اڭگىمەلەسىپ, اراق-شاراپ ساتپاۋعا كەلىسىمىن العان.
اۋدان اكىمىنىڭ قوعامدىق قابىلداۋىنا كەلگەن اقساقالداردىڭ ەندىگى ماقساتى – ماقتاارال اۋدانىنداعى 69 ەلدى مەكەننىڭ بارلىعىندا سپيرتتىك ىشىمدىك ساتۋدى ازايتۋ نەمەسە مۇلدە جويۋ. وسى ارقىلى اۋداندا قىلمىس سانىن ازايتىپ, ءاربىر وتباسىعا قۇت-بەرەكە دارىتۋ. اقساقالدار وسى ماقساتتى جۇزەگە اسىرۋ ءۇشىن اۋدان اكىمىنەن سپيرتتىك ىشىمدىك ساتاتىن كاسىپكەرلەرگە ىقپال ەتۋدى سۇراندى. بۇل ورايدا اۋدان اكىمى باقىت اسانوۆ قاريالاردىڭ باستاماسى وتە ورىندى ەكەنىن ايتىپ, زاڭ اياسىندا بارىنشا قولدايتىنىن جەتكىزدى. ەندىگى كەزەكتە ساۋدا ورىندارىنىڭ يەلەرى, ياعني كاسىپكەرلەر قاريالاردى قولداسا ماقتاارال ىشىمدىك اتاۋلى ساتىلمايتىن اۋدانعا اينالادى.