ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىندا ەرەكشە ءبىلىم بەرۋگە قاجەتتىلىگى بار بالالارعا تۇزەتۋ كومەگىن كورسەتۋگە مەملەكەتتىك تاپسىرىس بەرۋ جايىندا جازدى, دەپ حابارلايدى Egemen.kz.
«سوڭعى ۋاقىتتا ەرەكشە ءبىلىم بەرۋگە قاجەتتىلىكتەرى بار بالالار سانى كوبەيىپ جاتىر. وسى ساناتتاعى بالالاردىڭ ەرەكشە قاجەتتىلىكتەرىن انىقتالعاننان كەيىن, ولاردى قۇرداستارىمەن قاتار وقىتۋ ءۇشىن ارنايى پەداگوگتەردىڭ كومەگى قاجەت. ەڭ باستىسى, ماماندار ءار بالانىڭ قاجەتتىلىكتەرىنە سۇيەنە وتىرىپ جەكە تۇزەتۋ باعدارلاماسىن دايىنداپ ونى جۇزەگە اسىراتىن بولادى.
مۇنداي كومەك العان بالالار ينكليۋزيۆتى ورتاعا جاقسى بەيىمدەلەدى.
سونىمەن قاتار, وقۋ ماتەريالىن الدەقايدا وڭاي يگەرەدى. ال كەيبىرەۋلەرى ەرەكشە كومەككە مۇقتاجدىقتان تولىعىمەن ارىلادى. ولارمەن دەفەكتولوگتار, پسيحولوگتار, لوگوپەدتەر جانە ت.ب. ماماندار جۇمىس ىستەيدى», دەپ جازدى ا. ايماعامبەتوۆ.
وسى ورايدا مينيستر ەرەكشە بالالارعا ارنالعان ارنايى ورتالىقتار جەتىسپەيتىنىن ايتىپ ءوتتى.
«ۋاقىتىلى كومەك بولماعاندىقتان, بۇل ەرەكشەلىكتەردى تۇزەتۋ جانە بالانى ءبىلىم بەرۋ ورتاسىنا قوسۋ قيىنعا سوعىپ جاتىر. ەندى بۇل نورما مەملەكەتتىك ەمەس ۇيىمدارعا وسىنداي قاجەت ورتالىقتاردى اشۋعا جانە كورسەتىلگەن قىزمەتتەر ءۇشىن بيۋدجەتتەن قارجى الۋعا مۇمكىندىك بەرەدى. بۇل مەحانيزم جەكە بالاباقشالاردىڭ قىزمەتىمەن بىردەي. ەستەرىڭىزگە سالا كەتەيىن, ءدال وسىنداي تەتىك ارقىلى بالالاردى مەكتەپكە دەيىنگى تاربيە بەرۋ مەكەمەلەرىمەن قامتۋدى بىردەن ارتتىرعان ەدىك», دەلىنگەن جازبادا.