سوت «سق-فارماتسيانىڭ» ەكس-باسشىسىن بوساتۋدان باس تارتتى

سوت تىڭدالىمىندا سوتتالۋشىنىڭ ادۆوكاتتارى قاماۋدان بوساتۋ نەمەسە بۇلتارتپاۋ شاراسىن جەڭىلدەتۋ تۋرالى ءوتىنىش بىلدىرگەن ەدى. بەرىك ءشارىپ 361-باپتىڭ 4-بولىگى 3-تارماعى «لاۋازىمدىق وكىلەتتىلىكتەردى تەرىس پايدالانۋ بابىنىڭ ءبىرىنشى بولىگىندە كوزدەلگەن جاۋاپتى مەملەكەتتىك لاۋازىمدى اتقاراتىن ادام جاساعان ءىس-ارەكەت» بويىنشا ايىپ تاعىلعان. ايىپتالۋشىنىڭ ادۆوكاتى باۋىرجان بەيباتىر ەكس-باسشىنى تۇتقىنداۋ زاڭسىز ەكەنىن ايتىپ, ونى بوساتۋىن سۇرايدى.

«مەن بارلىق تەرگەۋ شارالارىنا قاتىستىم, ەشتەڭەنى جاسىرۋعا تىرىسقان جوقپىن, ويتكەنى مەن ءوزىمنىڭ كىناسىز ەكەنىمە سەنىمدىمىن. سىزدەن وسى تالاپ-ارىزدى قولداپ, قاماۋدان بوساتۋىڭىزدى سۇرايمىن», دەدى بەرىك ءشارىپ.

الايدا, نۇر-سۇلتان قالالىق ەسىل اۋدانىنىڭ №2 اۋداندىق سوتىنىڭ سۋدياسى ءوتىنىشتى قاناعاتتاندىرمادى.

ء«شارىپ جەتى جىلعا دەيىن باس بوستاندىعىنان ايىرۋ جازاسىن قاراستىراتىن اۋىر قىلمىس جاسادى دەپ كۇدىككە ىلىنگەن. بۇلتارتپاۋ شاراسىن تاڭداۋ كەزىندە قىلمىستىق ءىس جۇرگىزۋ كودەكسىنىڭ 136 جانە 147-باپتارىنىڭ نورمالارىنىڭ تالاپتارى ەسكەرىلدى, قاماۋدا ۇستاۋدىڭ ماكسيمالدى مەرزىمى ءالى اياقتالعان جوق. وسىعان بايلانىستى, قازىرگى كەزەڭدە بۇلتارتپاۋ شاراسىن وزگەرتۋگە نەگىز جوق», دەدى سۋديا.

ەسكە سالايىق, وتكەن جىلدىڭ 10 شىلدەسىندە «سق-فارماتسيا» باسقارما توراعاسى بەرىك ءشارىپ قىزمەتىنەن بوساتىلعان بولاتىن. ول توراعالىق قىزمەتكە 3 اي ۋاقىت بۇرىن عانا كەلگەن ەدى. ارتىنشا 14 تامىزدا  باسقارمانىڭ بۇرىنعى توراعاسى بەرىك ءشارىپ ۇستالدى.

گاۋحار قاپاش