مۇعالىمدەرگە ۆاكتسينا سالدىرۋدى مىندەتتەمەيدى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ ورتالىق كوممۋنيكاتسيالار قىزمەتىندە وتكەن بريفينگتە ايتتى. مۇعالىمدەر اراسىندا ەكپە الۋدى مىندەتتەمەسە دە سالدىرعاندار بار ەكەن.
«دەنساۋلىق ساقتاۋ مينيسترلىگىنىڭ دەرەگىنە سۇيەنسەك, وسىعان دەيىن ۆاكتسينا سالدىرعان قازاقستاندىقتاردىڭ 17 پايىزى مۇعالىمدەر ەكەن. وسىدان-اق ولاردىڭ ەكپە الۋعا دەگەن بەلسەندىلىگىن كورۋىمىزگە بولادى. دەگەنمەن ۆاكتسينالاۋ بارلىق ازاماتقا, سونىڭ ىشىندە مۇعالىمدەرگە دە ەرىكتى تۇردە جۇرگىزىلەدى. وعان ەشكىم ماجبۇرلەمەيدى. بىراق مەن مينيستر رەتىندە ارىپتەستەرىمدى, پەداگوگ قاۋىمدى ەكپە الۋعا, عىلىمعا سەنۋگە شاقىرامىن. ويتكەنى بۇل – ەڭ الدىمەن مۇعالىمدەردىڭ, سودان سوڭ وقۋشىلاردىڭ, ۇجىمنىڭ, تۇپتەپ كەلگەندە قوعامنىڭ قاۋىپسىزدىگى. مەن دە عىلىمعا سەنەمىن, بۇل – عىلىمنىڭ ۇلكەن جەتىستىگى. سوندىقتان ءوزىم دە العاشقىلاردىڭ ءبىرى بولىپ ۆاكتسينا سالدىردىم», دەدى ا.ايماعامبەتوۆ.
ۆەدومستۆو باسشىسى بريفينگ بارىسىندا وقۋشىلاردىڭ مەكتەپكە قاشان ورالۋى مۇمكىن ەكەنىن دە جەتكىزدى.
«بالالاردىڭ مەكتەپكە ورالۋى ۆاكتسينالاۋ مەن كارانتيندىك شەكتەۋلەردىڭ ساقتالۋىنا بايلانىستى. پاندەمياعا قاتىستى جاعداي جاقسارعان كەزدە جانە ەل وڭىرلەرى كۆي-ءدىڭ تارالۋ دەڭگەيى بويىنشا «سارى», سودان كەيىن «جاسىل ايماقتارعا» وتكەندە. ادەتتە, «جاسىل ايماقتاعى» وڭىرلەردە بالالاردىڭ بارلىعى دەرلىك مەكتەپتە ءبىلىم الۋعا قۇقىلى. بارلىعىن ءوزىمىزدىڭ ارەكەتىمىز شەشەدى. سەبەبى بۇل – بارىمىزگە ورتاق ماسەلە. ەگەر بارلىق ادام سانيتارلىق دارىگەرلەردىڭ تالاپتارى مەن ۇسىنىستارىن ورىنداسا, بالالار مەكتەپكە تەزىرەك ورالادى», دەدى مينيستر.
بۇدان بولەك, ا.ايماعامبەتوۆ وتاندىق ۆاكتسينانىڭ ازىرلەنۋ بارىسىنا دا توقتالدى.
ء«بىزدىڭ عالىمدار كوروناۆيرۋستىڭ «بريتاندىق», «وڭتۇستىكافريكالىق» شتامدارى بويىنشا زەرتتەۋ جۇرگىزىپ جاتىر. شىن مانىندە ولاردىڭ ەڭبەگى ولشەۋسىز, قازىرگى تاڭدا كۇنى-ءتۇنى تىنباي جۇمىس ىستەۋدە. وتاندىق ۆاكتسيناعا كەلسەك, كوپ قازاقستاندىقتىڭ اسىعا كۇتىپ وتىرعانىن بىلەمىز. دەگەنمەن ءسال سابىرلىق تانىتىپ, عالىمدارىمىزعا قولداۋ كورسەتەيىك. ويتكەنى قازىر ءتيىستى ستاندارتتار بويىنشا جۇمىستار اتقارىلىپ جاتىر. بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى ازىرلەگەن ۆاكتسيناعا قاتىستى بارلىق ءراسىم بەكىتىلگەن كەستەگە سايكەس جۇرگىزىلىپ وتىر. بۇل رەتتە ەشقانداي پروبلەما جوق. ءبىزدىڭ ارىپتەستەر 50 مىڭ دوزا بويىنشا قاجەتتى جۇمىستار جۇرگىزدى. حاتتاما بويىنشا ۇنەمى حيميالىق تالداۋ مەن بيولوگيالىق قاداعالاۋ جاسالادى. قازىر بيولوگيالىق قاداعالاۋدى اياقتاپ جاتىر. كەستەگە سايكەس, بيىلعى ءساۋىر ايىنىڭ سوڭىنا قاراي, 20-سىنان كەيىن قۇجاتتاردى دەنساۋلىق ساقتاۋ مينيسترلىگىنە تاپسىرامىز. ولار ناتيجەلەرگە تالداۋ جاساي وتىرىپ, ءتيىستى شەشىم قابىلدايدى», دەدى ۆەدومستۆو باسشىسى.