مەملەكەت باسشىسى قاسىم-جومارت توقاەۆ تۇركىتىلدەس مەملەكەتتەردىڭ ىنتىماقتاستىق كەڭەسىنىڭ بەيرەسمي سامميتىندە تۇركىستان قالاسى مادەنيەتتىڭ, ەكونوميكانىڭ دىڭگەگىنە اينالۋى كەرەكتىگىن ايتقان ەدى. وسىعان وراي تۇركىستان قالاسىندا كرەاتيۆتى يندۋستريا قاۋىمداستىعى قۇرىلىپ وتىر, دەپ حابارلايدى Egemen.kz
ۇيىمنىڭ ماقساتى – تۇركى حالىقتارىنا ورتاق بيزنەس الاڭ قالىپتاستىرۋ, جوعارى زياتكەرلىك جانە يننوۆاتسيالىق سالالاردى قولداۋ, جاستار اراسىندا شىعارماشىلىق قۋاتتى وياتۋ.
بۇل تۋرالى بريفينگتە تۇركىستان وبلىسى اكىمىنىڭ ورىنباسارى مەيىرجان مىرزاليەۆ مالىمدەدى.
«تۇركى الەمىنىڭ رۋحاني استاناسى مارتەبەسىنە يە بولۋ, سونداي-اق تاريحي قۇندىلىعىن ەسكەرە وتىرىپ, قالا بىرەگەي كرەاتيۆتى كلاستەردى دامىتۋدا جوعارى الەۋەتكە يە. بۇل تۇركىستاندى جاھاندىق يننوۆاتسيالىق مادەني ورتالىققا اينالدىرۋعا مۇمكىندىك بەرەدى. وسى ماقساتتا ءبىز تۇركى حالىقتارىنا ورتاق كرەاتيۆتى يندۋستريا قاۋىمداستىعىن قۇرىپ وتىرمىز. ءبىزدىڭ ويىمىزشا, كرەاتيۆتى ەكونوميكانى دامىتۋ – بۇكىل ءوڭىردىڭ باسەكەگە قابىلەتتىلىگىن ارتتىرۋعا جاسالاتىن ماڭىزدى قادام», دەدى مەيىرجان مىرزاليەۆ.
سونداي-اق بريفينگكە ونلاين فورماتتا قاتىسقان «FUTURK» تۇركىتىلدەس ەلدەرىنىڭ كرەاتيۆتى يندۋستريا قاۋىمداستىعىنىڭ ءتورايىمى ەلميرا سارسەناليەۆا تۇركىستانداعى قاۋىمداستىق جۇمىسىمەن تانىستىردى.
«مەملەكەت باسشىسى ايتقانىنداي, تۇركىستان – تەك مادەنيەتتىڭ عانا ەمەس, ەكونوميكانىڭ دا وزەگىنە اينالۋى ءتيىس. وسى ماقساتتا قاۋىمداستىق قۇرىلىپ وتىر. اتالعان الاڭدا الداعى ۋاقىتتا تۇركى حالىقتارىنىڭ كاسىپكەرلەرى تاجىريبە الماسادى. بۇل – تۇركىتىلدەس ەلدەردىڭ تالانتتى جاستارىنا قولداۋ كورسەتەتىن ۇيىم بولماق. قاۋىمداستىقتىڭ ميسسياسى – تۇركى حالىقتارىنا ورتاق مادەني, تۋريستىك, اقپاراتتىق ورتا قالىپتاستىرۋ. باستىسى, شاعىن جانە ورتا كاسىپكەرلىكتى قولداۋ», دەدى ەلميرا الىمجانقىزى.