تۇركىستان وبلىسىندا ءوز ەركىمەن كوروناۆيرۋسقا قارسى ەكپە قابىلداعان 13 مىڭعا جۋىق تۇرعىننىڭ 10 674-ءى مەديتسينا قىزمەتكەرى بولسا, 1276-ى پەداگوگ. سونداي-اق 444 پوليتسيا قىزمەتكەرى مەن 75 باسقادا ساناتتاعى ازاماتتار بار. ال 3264 ادام ەكىنشى كومپونەنتپەن ۆاكتسينا سالدىردى. COVID-19-عا قارسى ۆاكتسيناتسيالاۋ 20 ەمدەۋ مەكەمەلەرىندە جۇرگىزىلۋدە.
بۇگىندە وڭىردە ەپيدەميالىق جاعداي تۇراقتى. سوڭعى تاۋلىكتە تۇركىستان وبلىسىندا 6 ادامدا COVID-19 ىندەتى راستالعان. تاۋلىكتىك ءوسىم – 0.16%. جالپى وبلىستا پاندەميا بەلەڭ العالى 574 400 پتر- سىنامالارى الىنعان. وبلىستىق قوعامدىق دەنساۋلىق باسقارماسىنىڭ باسشىسى مارات پاشيموۆتىڭ بايانداۋىنشا, سوڭعى تاۋلىكتە زەرتحانالاردا 2758 ادام تەكسەرىلگەن. جۇقپالى اۋرۋلار اۋرۋحاناسىندا بارلىعى 610 ورىن بار, ولاردىڭ 478-ءى بوس. وبلىستاعى مەكەمەلەردە 8 وتتەگى ستانتسياسى, 400 ءوجج اپپاراتى, مىڭنان اسا وتتەگى اپپاراتى بار. ەكى ايعا جەتەتىن ءدارى-دارمەك قورى جاساقتالعان, 40-تان استام ءدارى قويماسى, 800-دەي ءدارىحانا جۇمىس ىستەيدى.
ايتا كەتەلىك, وڭىردە جالپى 23429 مەديتسينا قىزمەتكەرى بار. ونىڭ 5000-نان استامى دارىگەر, قالعاندارى ورتا بۋىن ماماندارى. اق حالاتتى جانداردىڭ ءمىنسىز قىزمەتى ارقاسىندا وڭىردە قاۋىپتى ىندەتتى جۇقتىرعان 4292 ناۋقاس تولىق جازىلىپ شىققان. جالپى, پاندەميا باستالعالى COVID-19 ينفەكتسياسى راستالعان 4445 جاعداي تىركەلگەن. ولاردىڭ 2849-دا اۋرۋ سيمپتومسىز وتكەن.
تۇركىستان وبلىسى