سامۋسەۆ پەن جانىبەكۋلۋ اراسىندا وتەتىن ايقاسقا از كۇن قالدى

«بۇل جەكپە-جەكتىڭ شەشۋشى فاكتورى نە بولماق؟ سامۋسەۆتىڭ سوققى جاساۋداعى باسىمدىلىعى ما الدە جانىبەك ۋلۋنىڭ توزىمدىلىگى مەن جوعارى ساناتتى گرەپپلينگى مە؟» دەگەن ساۋالعا قارسىلاستاردىڭ جەڭىسكە جەتۋ مۇمكىندىكتەرى تۋرالى پىكىر بىلدىرگەن  قر ەڭبەك سىڭىرگەن سپورت شەبەرى, مما جانە دجيۋ-دجيتسۋدان 4 دۇركىن الەم چەمپيونى ايدار ماحمەتوۆ جاۋاپ بەردى.

ء«سوز جوق, ءبىزدى قىزىقتى قاقتىعىس كۇتەدى. ءبىز سوققى جاساۋ شەبەرى مەن پالۋان اراسىنداعى كلاسسيكالىق جەكپە-جەكتى كورەمىز. قانىبەك جانىبەك ۋلۋ قويانقولتىق كۇرەستىڭ مامانى, وعان قوسا تاماشا گرەپپلينگ پەن جوعارى توزىمدىلىككە يە. ءار جەكپە-جەكتىڭ الدىندا ول 20 كگ سالماق تاستاعانىمەن, ۇزاق باسەكەگە شىدامدى. جاۋىنگەر مىعىم دەنەلى, سونداي-اق ونىڭ قازاقستاندىق مما جاۋىنگەرلەرىمەن كەزدەسۋ بويىنشا تاجىريبەسى بار. قانىبەك تەك جەڭىس ءۇشىن كەلەدى جانە NFC بەلبەۋىن يەلەنۋگە بار كۇشىن سالۋعا ساقاداي ساي. نيكولاي سامۋسەۆ - تاي بوكسىنان الەم چەمپيونى, بىرنەشە جىل بۇرىن ول مما-دا ءوز كۇشىن سىناپ كورۋدى شەشتى. ول كۇرەس تاسىلدەرىن جانە قارسىلاستان اياققا وتۋدەن قورعانۋ تۇرعىسىنان ءوزىن ۇنەمى جەتىلدىرىلىپ وتىرادى جانە گرەپپلينگتى جاقسى يگەردى. جاۋىنگەر وتە كۇشتى, ەكى قولىمەن دە جويقىن سوققى جاساي الادى. ونىڭ ۇستىنە, ونىڭ سوققىسى قارسىلاسىن نوكاۋتقا تۇسىرەدى. نيكولايدىڭ باستى مىندەتى - قانىبەكتى اياققا وتۋگە جىبەرمەۋ. نيكولاي قىرعىز فايتەرىنىڭ وسىنداي تالپىنىستارىنا العاشقى راۋندتاردا توتەپ بەرە السا, سامۋسەۆ قانىبەككە قاراعاندا ءۇش ەسە از جەكپە-جەككە وتكىزگەندىگىنە قاراماستان, كەزدەسۋدىڭ جەڭىمپازى اتانا الادى. جەڭىسكە سامۋسەۆ جەتەدى دەپ ويلايمىن», - دەپ ءتۇسىندىردى ساراپشى.

DAR Pro Team كومانداسىنىڭ وكىلى, تۋمىسى قازاق, رەسەيلىك مما جاۋىنگەرى دامير يسماعۇلوۆ تا الداعى جەكپە-جەككە قاتىستى ءوز بولجامىن ايتتى.

«قىرعىز مما جاۋىنگەرلەرىنىڭ مىقتى فيزيكالىق مۇمكىندىكتەرىن ايتىپ وتكىم كەلەدى. مەنىڭ ويىمشا, بۇل باسەكەدە قانىبەك كۇش پەن قۋاتقا سۇيەنەدى. ال نيكولايمەن ءبىز بۇرىننان تانىسبىز, ول مەنىڭ سپاررينگتىك سەرىكتەسىم بولدى جانە ماعان UFC جەكپە-جەكتەرىن دايىندالۋىما كومەكتەستى. ونىڭ ارسەنالىندا تاي بوكسىنىڭ داعدىلارى بار جانە ول ۇنەمى ءوزىن جەتىلدىرىپ, دامىپ كەلەدى. سوڭعى ۋاقىتتا ول جاڭا دەڭگەيگە جەتتى, ءبىز ونى انىق بايقادىق. جەكپە-جەككە قاتىستى مەنىڭ بولجامىم - سامۋسەۆتىڭ ەكىنشى راۋندتا مەرزىمىنەن بۇرىن جەڭىسى».

ەستەرىڭىزگە سالا كەتەيىك, 9 ساۋىردە NAIZA Fighting Championship ءپروموۋشنى مما جانكۇيەرلەرىنە تارتىستى كەزدەسۋلەردىڭ توپتاماسىن ۇسىنادى. كەشتىڭ باستى وقيعاسى - 65,8 كيلوگرامم سالماق دارەجەسىندە NFC ليگاسىنىڭ ۋاقىتشا چەمپيونى اتاعى ءۇشىن قازاقستاندىق فايتەر نيكولاي سامۋسەۆ (6-0) پەن قىرعىزستاننان كەلگەن قانىبەك جانىبەك ۋلۋ (11-3) اراسىنداعى ايقاس.

يۆەنتتىڭ تىكەلەي كورسەتىلىمى نۇر-سۇلتان ۋاقىتىمەن ساعات 19:00-دە باستالادى جانە ونى NAIZA TV Youtube-ارناسىنان تاماشالاۋعا بولادى.