مەملەكەت باسشىسى قاسىم-جومارت توقاەۆتىڭ تاپسىرماسىمەن وتكەن جىلى رەسپۋبليكا كولەمىندە العاش رەت جامبىل وبلىسىندا «بەيبىتشىلىك پەن كەلىسىم» جوباسى قولعا الىنعان بولاتىن. اتالعان جوبا وڭىردە ناۋرىز ايىنان قايتادان باستاۋ الىپ, «ەتنوس جانە كونفەسسياارالىق كەلىسىم», «الەۋمەتتىك-تۇرمىستىق ماسەلەلەردى شەشۋ جانە بيزنەستى دامىتۋ» مەن «قۇقىق قورعاۋ سالاسى» توبى قۇرىلدى.
جوبانىڭ جۇمىسشى توپتارىنىڭ نەگىزگى ماقساتى – وبلىس تۇرعىندارىنىڭ ءال-اۋقاتىن ارتتىرۋ, ءبىلىم بەرۋ مەن مەديتسينالىق قىزمەتتەر ساپاسىن جاقسارتۋ, وبلىس جۇرتشىلىعىنىڭ ءدىني ءبىلىم دەڭگەيىن كوتەرۋ, ازاماتتارعا ارنالعان جىلجىمالى قابىلداۋ وتكىزۋ, الەۋمەتتىك ماسەلەلەرىن شەشۋ بولىپ وتىر. سونداي-اق, بوس جۇمىس ورىندارىنىڭ جارمەڭكەلەرىن ۇيىمداستىرۋ, حالىققا نەسيە بەرۋ بويىنشا كەڭەس بەرۋ, حالىقتىڭ الەۋمەتتىك وسال توپتارىنىڭ ماسەلەلەرىن شەشۋ, زاڭ اياسىندا كومەكتەسۋ, بيزنەستى قولداۋ جانە دامىتۋ بويىنشا جۇزەگە اسىرىلىپ جاتقان جوبالار مەن مەملەكەتتىك باعدارلامالار تۋرالى اقپاراتتاندىرۋ جۇمىستارىن جۇرگىزۋ سياقتى جۇمىستار دا بار. «بەيبىتشىلىك پەن كەلىسىم» جوباسى وتكەن جىلى ناتيجەلى اياقتالدى. ال, اعىمداعى جىلى اتالعان جوبا ءوڭىردىڭ مەركى, شۋ, بايزاق جانە جامبىل اۋداندارىندا جەمىستى باستالىپ, وبلىستىق ىشكى ساياسات باسقارماسىنىڭ قولداۋىمەن بارلىعى 430 ءىس-شارا ۇيىمداستىرىلدى. جوباعا 10 مىڭ 400 ادام تارتىلدى. اۋدانداردا 72 قوعامدىق قابىلداۋ مەن 110 كەزدەسۋ ءوتىپ, 600-گە جۋىق ازاماتتىڭ ماسەلەسىن شەشۋگە كومەك بەرىلدى. سونىمەن قاتار, 250-دەن استام ازاماتقا مەديتسينالىق كومەك كورسەتىلىپ, 150-گە جۋىق تۇرعىننىڭ قايتارىمسىز گرانت الۋ ماسەلەسى شەشىلدى. 241 ادام تۇراقتى جۇمىسقا ورنالاسسا, 29 جاس جاستار تاجىريبەسىنە جولداما الدى.
قۇقىق قورعاۋ سالاسى توبىنىڭ مۇشەلەرى 367 ادام قامتۋ ارقىلى 18 ءىس-شارا وتكىزىپ, 89 ادامعا زاڭنامالىق كەڭەس بەرگەن. جوبانىڭ جۇمىس توبى قۇرامىنا وبلىس اۋماعىنداعى بارلىق قۇقىق قورعاۋ جانە مەملەكەتتىك ورگاندارمەن قاتار باسقارمالاردىڭ ماماندارى ەنگىزىلگەن. وسى ماقساتتاعى جۇمىستار ەندى ناۋرىز ايىنىڭ سوڭىنا دەيىن تالاس, سارىسۋ جانە قورداي اۋداندارىندا وتەتىن بولادى. اتالعان اۋدانداردىڭ تۇرعىندارى ءتۇيىندى ماسەلەلەرى مەن كوكەيدە جۇرگەن سۇراقتارىن ۇيىمداستىرىلاتىن جوبانىڭ جۇمىسشى توبىمەن كەزدەسىپ, نازارلارىنا جەتكىزۋگە مۇمكىندىكتەرى بار. جوبا جۇمىسىن اياقتاعان سوڭ تۇرعىندار تاراپىنان كوتەرىلگەن ماسەلەلەر بويىنشا جول كارتاسى جاساقتالىپ, ورىندالۋى باقىلاۋعا الىنادى.