شيپالى سۋىمەن تانىمال سارىاعاش شيپاجايىنا كەلىپ ەم الۋشىلاردىڭ سانى جىل وتكەن سايىن ارتا تۇسۋدە. بيىل اۋدانعا 100 مىڭ تۋريست كەلەدى دەپ جوسپارلانۋدا. وسى باعىتتى دامىتۋ ماقساتىندا جالپى قۇنى 430 ملن تەڭگە بولاتىن ءۇش نىسان ىسكە قوسىلادى. سونداي-اق 100-گە جۋىق ادام تۇراقتى جۇمىسپەن قامتىلماق, دەپ حابارلايدى Egemen.kz.
بيىل اۋداننىڭ تۋريستىك يندۋسترياسىنىڭ قازىرگى جاعدايىنا زەرتتەۋ جانە تۇگەندەۋ جۇمىستارىن جۇرگىزۋ ماقساتىندا جەرگىلىكتى بيۋدجەتتەن 10 ملن تەڭگەدەن اسا قارجى قاراستىرۋ جوسپارلانىپ وتىر.
سارىاعاش اۋدانىنا وتكەن جىلى 85 مىڭ تۋريست كەلگەن. تۋريستەرگە 50-دەن استام ەمدىك ساۋىقتىرۋ, بالالار شيپاجايلارى, بالالار ساۋىقتىرۋ لاگەرى, گولف كلۋبى, 21 قوناق ءۇي قىزمەت كورسەتەدى. بىلتىر ءتۋريزمدى دامىتۋ ماقساتىندا جالپى قۇنى 378 ملن تەڭگە بولاتىن ءتورت نىسان ىسكە قوسىلىپ, 60-قا جۋىق جاڭا جۇمىس ورنى اشىلعان. اۋدان اكىمى مۇحيت وتارشيەۆتىڭ ايتۋىنشا, بىلتىر 22 ملرد تەڭگەگە جۋىق ينۆەستيتسيا تارتىلسا, ول مەجەنى بيىل 25 ملرد تەڭگەگە جەتكىزۋ كوزدەلىپ وتىر. سونىمەن قاتار اۋداندا بىرقاتار جاڭا جوبالاردى ىسكە قوسۋ جوسپارلانعان. اتاپ ايتساق, جۇمىرتقا قورابىن شىعاراتىن تسەح پەن مينەرالدى سۋ قۇيۋ زاۋىتىن ىسكە قوسۋ قاراستىرىلۋدا. سونداي-اق 30 شاعىن جانە ورتا كاسىپكەرلىك نىساندارىن ىسكە قوسىپ, 3 ملرد تەڭگە كولەمىندە ينۆەستيتسيا تارتۋ جوسپاردا بار. بۇدان وزگە «قاراپايىم زاتتار ەكونوميكاسى» باعدارلاماسى اياسىندا 25 جوباعا قولداۋ كورسەتىلمەك.