سىرداريا اۋدانىنىڭ اكىمى تالعات دۇيسەباەۆ اقىن, قازاقستاننىڭ قۇرمەتتى ءجۋرناليسى, «سىرداريا اۋدانىنىڭ قۇرمەتتى ازاماتى» مۇحتار ساقتاپوۆتى 85 جاسقا تولۋىمەن قۇتتىقتادى. اقىننىڭ شاڭىراعىنا بارعان اۋدان باسشىسى قالامگەردىڭ ادەبيەتكە قوسقان سۇبەلى ۇلەسىن ايرىقشا اتاپ ءوتتى.
– كەمەڭگەرلىك پەن كەمەلدىككە جارقىن كوڭىلمەن كەلىپ وتىرسىز. ءسىزدىڭ ولەڭدەرىڭىز ارقىلى جاس ۇرپاق تاعىلىمدى تاربيە الا ءبىلدى. وسى توپىراقتا تۋىپ-ءوسىپ, شىعارمالارىمەن ۇلتتىق ادەبيەتتى بايىتقان اقيىق اقىن اسقار توقماعامبەتوۆ, قىرعي ءتىلدى قالتاي مۇحامەدجانوۆ, ءسوز زەرگەرى ءابىراش جامىشەۆ, اقىندار زاماددين يبادۋللاەۆ, بالاشبەك شاعىروۆ, قايىربەك اسانوۆتى جانە ءوزىڭىزدى جەرلەستەرىڭىز ماقتانىش ەتەدى, – دەدى تالعات تۇرسىن ۇلى.
اۋدان باسشىسى مەرەيتوي يەسىنە شاپان جاۋىپ, سىي-قۇرمەت كورسەتتى. مۇحتار جانالحان ۇلى سىرداريا اۋداندىق «تىرشىلىك تىنىسى» گازەتىندە 40 جىل جۇمىس جاساپ, كوررەكتور, ادەبي قىزمەتكەر, ءبولىم مەڭگەرۋشىسى, جاۋاپتى حاتشى, باسپاحانا ديرەكتورى قىزمەتتەرىن ابىرويمەن اتقارعان. «كوڭىل شۋاعى», «قايىرلى تاڭ, تۋعان جەر!» سەكىلدى بىرنەشە جىر-جيناقتىڭ اۆتورى. قارت قالامگەر وزىنە كورسەتىلگەن قۇرمەتكە ريزاشىلىعىن ءبىلدىرىپ, باتاسىن بەردى.