بۇگىندە رەسپۋبليكا بويىنشا سالىمشىلاردىڭ زەينەتاقى قورىنداعى قارجىسىنىڭ شەكتى مولشەردەن اسقان بولىگىن الۋ ءۇشىن «وتباسى بانكىنەن» 107 774 ارنايى شوت اشىلعان. 50 مىڭعا جۋىق ازاماتتىڭ ءوتىنىمى ماقۇلداندى. ال وبلىستا زەينەتاقى قورىنداعى قارجىنى 29 مىڭنان استام ادام الۋعا قۇقىلى.
زەينەتاقى قورىنان بىرجولعى قارجى الۋعا ءوتىنىم بەرۋ ۇستىمىزدەگى جىلدىڭ 23-قاڭتارىندا باستالدى. وتىنىشتەردى enpf-otbasy.kz سايتىندا قابىلداۋ جالعاسۋدا. ءوتىنىم 5 جۇمىس كۇننىڭ ىشىندە قارالادى.
- قوردان اقشا الۋعا ءوتىنىم بەرۋ ءۇشىن بەلگىلى ءبىر شەكتىك ۋاقىت جوق. قارجىنى الۋ ءبىر جىلمەن شەكتەلىپ قالمايدى. مەملەكەتتىك باعدارلاما جالعاسىن تابادى, - دەدى «وتباسى بانك» تۇرعىن قۇرىلىس ءۇي جيناق بانكى» اق وبلىس بويىنشا فيليال ديرەكتورى ءادىلجان ساۋلەباەۆ.
بريفينگتە سالا ماماندارى جيناقتان العان قاراجاتتى جەر ۋچاسكەسىن ساتىپ الۋعا, ءۇي سالۋعا جانە باستاپقى جارنانى تولەۋگە پايدالانۋعا بولاتىنىن ايتتى. تەك ءبىر شەكتەۋ بار. ول قوردان الىنعان قارجىعا ساتىپ الىنعان ءۇيدى 5 جىل ىشىندە قايتادان ساتۋعا بولمايدى.
- ءبىر اپتا ىشىندە زەينەتاقى قورىنا وتباسى بانكىنەن 52 133 ءوتىنىم قابىلداندى. سونداي-اق, «قازاقستان حالىق بانك» وپەراتورىنان جالپى سوماسى 587,7 ملن. تەڭگە قۇرايتىن 132 ءوتىنىم كەلدى. قىسقا ۋاقىت ىشىندە قور تاراپىنان كەرى قايتارىلعان وتىنىمدەر دە بولدى, - دەدى «بجزق» اق وبلىس بويىنشا فيليال ديرەكتورىنىڭ ورىنباسارى الماس سارسەمباەۆ.