شىمكەنتتى كوگالداندىرۋدىڭ ستراتەگياسى جاسالادى

شىمكەنت قالاسىنىڭ اكىمى مۇرات ايتەنوۆكە تابيعي رەسۋرستار جانە تابيعات پايدالانۋدى رەتتەۋ باسقارماسىنىڭ باسشىسى احمەت تاتىباەۆ قالانى كوگالداندىرۋ ستراتەگياسىنىڭ جوباسىن ۇسىندى. وندا ساياباق پەن گۇلزارلاردى اباتتاندىرۋ, ەسكەرتكىشتەر, اعاش كوشەتتەرىن ءوسىرۋ, قۇرىلىس جانە قايتا جاڭارتۋ سەكىلدى نەگىزگى ماسەلەلەر قاراستىرىلعان.

ستراتەگياعا سايكەس, 8 نەگىزگى ساياباقتى قايتا قۇرۋ جوسپارى دايىندالدى. ودان بولەك 39 گۇلزار اباتتاندىرىلادى. قالا اۋماعىنداعى ەسكەرتكىشتەردى دە رەتكە كەلتىرۋ, قوشقار اتا وزەنى ماڭىنداعى بالالار باسسەينىن قالىپقا كەلتىرۋ دە جوسپارعا ەنگىزىلگەن.

جوباعا ساي 8,2 گەكتار اۋماققا 1 ميلليون ءتۇپ اعاش كوشەتتەرى وسىرىلەدى. ءار اۋداننان 10 گەكتار جەر ءبولىنىپ, جالپى 40 گا اۋماققا جاسىل ايماق قۇرۋ كوزدەلىپ وتىر. ولارعا سۋارۋ جۇيەلەرى دە ورناتىلادى.

سونىمەن قاتار, مەملەكەت باسشىسىنىڭ تاپسىرماسىنا سايكەس, شىمكەنت قالاسىندا جاسىل بەلدەۋدى دامىتۋ ماقساتىندا ءىس-شارالار جوسپارى بەكىتىلگەن. وسىعان وراي اعاشتاردى ەلەكتروندىق ەسەپكە الۋ جۇيەسىن ەنگىزۋ مەن اۋداندار بولىنىسىندە قالا بويىنشا تۇگەندەۋ جۇرگىزۋ قولعا الىنادى. 2025 جىلعا دەيىن شىمكەنتتە جاسىل ايماقتى 21544 گا دەيىن ۇلعايتۋ جوسپارلانعان. وندا 6,5 ملن. دانا اعاش-بۇتالار وسىرىلەتىن بولادى.

جيىندى قورىتىندىلاعان قالا اكىمى شاھاردى جاسىل قالاعا اينالدىرۋدىڭ ستراتەگياسىن جاساۋدى جانە ءماسليحات قاراۋىنا ۇسىنۋدى تاپسىردى.