شىعىس قازاقستان وبلىسىندا ءبىر عاسىر جاساعان 66 قاريا تۇرادى. بۇل تۋرالى Altaynews.kz حابارلادى.
بۇگىندە اتالعان ايماقتا تۇراتىن ۇلاندىق گۇلسارا شارمانوۆا 111 جاسقا كەلدى. وسى ورايدا, 90 مەن 100 جاس ارالىعىنداعى قارتتاردىڭ سانى 200-نان اسىپ كەتكەنىن اتاپ وتكەن ءجون. ولار وزدەرىنىڭ ونەگەلى جولىنان جاستارعا ءاردايىم سىر شەرتىپ, كەڭەس بەرىپ وتىرادى. جاقىندا وبلىس اكىمى بەردىبەك ساپارباەۆ وسى ابزال جاندارمەن كەزدەسۋ وتكىزىپ, يگى تىلەگىن جەتكىزدى. ول ءوز سوزىندە وبلىستا اقساقالدار مەن سوعىس ارداگەرلەرى كەڭەسىنىڭ جۇمىس ىستەيتىنىن, 1000-نان اسا ارداگەرلەر ۇيىمدارى قۇرىلعانىن اتاپ ءوتتى.
«شىعىس وڭىرىندە قاريالاردى, جالعىز باستى زەينەتكەرلەردى قولداۋ ماقساتىندا «جاقسى ءىس جاسا», «قايىرىمدىلىق ايى» سىندى اكتسيالار ءداستۇرلى تۇردە ۇيىمداستىرىلىپ كەلەدى. وبلىستا ەگدە ادامدارعا 13 دارىگەرلىك-الەۋمەتتىك مەكەمە قىزمەت كورسەتەدى. جالپى, وبلىستا ءبىر عاسىر جاساعان 66 قاريا بار. «قارتى باردىڭ قازىناسى بار» دەيدى حالقىمىز. بۇگىنگى قوعامنىڭ باستى قۇندىلىعى – قارتتاردىڭ ەل يگىلىگى ءۇشىن جاساعان قىزمەتى, بەيبىت تىرشىلىكتىڭ, ۇلتتار دوستىعى مەن بەرەكە-بىرلىكتىڭ بەرىك نەگىزىن قالاۋعا تيگىزگەن سەپتىگى جاس ۇرپاق ءۇشىن ۇلگى بولماق, - دەدى ول ءسوز ورايىندا.
باقىتبەك كەنەش ۇلى.
دەرەككوز: Altaynews.kz
فوتو: Altaynews.kz