وتكەن اپتا سوڭىندا الەۋمەتتىك جەلىلەردە قىزىلوردا قالاسىندا ءبىر وقۋشىنىڭ كوروناۆيرۋس ىندەتىنەن قايتىس بولعانى جايلى جازبا جاريالانعان ەدى. وسىعان بايلانىستى دۇيسەنبى كۇنى وبلىستىق دەنساۋلىق ساقتاۋ, ءبىلىم باسقارمالارى باسشىلارى بريفينگ وتكىزىپ, وقيعانىڭ جاي-جاپسارىن ايتىپ بەردى.
دەنساۋلىق ساقتاۋ باسقارماسىنىڭ باسشىسى ءسابيت پازىلوۆتىڭ ايتۋىنشا 5 قاڭتاردان باستاپ مەكتەپ وقۋشىسىنىڭ ىستىعى كوتەرىلىپ, ءوزىن جايسىز سەزىنە باستاعان ەكەن. ونىنشى قاڭتار كۇنى №5 ەمحاناعا قارالىپ, وبلىستىق جۇقپالى اۋرۋلار اۋرۋحاناسىنا جاتقىزىلادى. وسى ەمدەۋ مەكەمەسىندە الىنعان پتسر تەست تەرىس ناتيجە بەرگەن سوڭ, 19 قاڭتار كۇنى بالالار اۋرۋحاناسىنا اۋىستىرىلىپتى. بۇل جەردە الىنعان سىناما دا بالا بويىندا كوروناۆيرۋس ينفەكتسياسىنىڭ جوقتىعىن كورسەتكەن. رەسپۋبليكاداعى باسقا دا تاجىريبەلى ماماندارمەن اقىلداسا وتىرىپ, قويىلعان باسقا دياگنوز دا انىقتالماپتى. نەشە كۇنگى ەمنەن كەيىن دە وڭالماعان 10 جاستاعى بالا 24 قاڭتار كۇنى كوز جۇمدى. وعان دارىگەرلەر «وكپە, جۇرەك جەتكىلىكسىزدىگى» دەگەن دياگنوز قويىپ وتىر.
وبلىستىق ءبىلىم باسقارماسىنىڭ باسشىسى اقزيرا قاسىموۆا قايتىس بولعان مەكتەپ وقۋشىسىنىڭ قىزىلوردا قالاسىنداعى №8 پ.وسيپەنكو اتىنداعى مەكتەپتىڭ 4 سىنىبىندا وقىعانىن ايتىپ ءوتتى.
– بالا ءى توقساننان باستاپ ونلاين فورماتتا, قاشىقتان وقىپ كەلگەن. وقۋ ۇلگەرىمىنە قاتىستى پروبلەما تۋىنداعان ەمەس. قاشىقتان وقىتۋعا بايلانىستى ەلەكتروندى تەحنيكامەن قامتىلعان. بالا اۋىرعاننان باستاپ, سىنىپ جەتەكشىسى وتباسىمەن ۇنەمى حابارلاسىپ, جاعدايىن ءبىلىپ وتىرعان, – دەيدى باسقارما باسشىسى.
بريفينگتە باسقارما باسشىسى مەكتەپتەردەگى وقۋ پروتسەسىن ۇيىمداستىرۋ باس مەملەكەتتىك سانيتاريالىق دارىگەردىڭ قاۋلىسى نەگىزىندە جۇرگىزىلەتىنىن جەتكىزدى. ءبىلىم بەرۋ ۇيىمدارىندا سانيتاريالىق تالاپتار تولىق ساقتالعان. ءداستۇرلى تۇردە وقيتىن بالالار 5 ساتىلىق دەزينفەكتسيالىق تەكسەرۋدەن وتەدى. مەكتەپكە اتا-انالاردىڭ كىرۋىنە تيىم سالىنعان. وقۋشىلاردىڭ دا شوعىرلانباۋى ۇدايى قاداعالانىپ وتىرادى. وبلىس بويىنشا قازىر 89 258 وقۋشى قاشىقتان, 80 636 شاكىرت ءداستۇرلى فورماتتا ءبىلىم الۋدا.
جالپى وقۋ جىلى باستالعالى بەرى 22 وقۋشى كوۆيدكە شالدىعىپتى. ونىڭ 6-ى ءداستۇرلى تۇردە كەزەكشى سىنىپتاردا ءبىلىم الاتىندار قاتارىنان انىقتالسا, 16-ى قاشىقتان وقيتىندار اراسىنان شىعىپ وتىر.
جۋرناليستەرمەن كەزدەسۋدە وبلىستىق دەنسۋلىق ساقتاۋ باسقارماسىنىڭ باسشىسى ءسابيت پازىلوۆ پەن باس مەملەكەتتىك سانيتارلىق دارىگەر ءاليا ابدىقايىموۆا وڭىردەگى ەپيدەميالىق احۋال جايلى دا بايان ەتتى. وسى كۇنگە دەيىن وبلىستا 3544 ناۋقاس تىركەلگەن, اپتانىڭ العاشقى كۇنى تاعى 9 جاعداي انىقتالىپ وتىر. ىندەتكە شالدىققانداردىڭ 96,6 پايىزى ەمەلىپ شىعىپتى. قازىر ينفەكتسيالىق ستاتسيوناردا 38 ناۋقاس ەم الۋدا, ونىڭ 4-ەۋى جانساقتاۋ بولىمىنە جاتقىزىلعان.
اقپان ايىنان باستاپ كوروناۆيرۋس ينفەكتسياسىنا قارسى ەكپە سالىنادى. وڭىرگە رەسەيلىك «سپۋتنيك V» ۆاكتسيناسىنىڭ 80 مىڭ دوزاسى كەزەڭ-كەزەڭىمەن اكەلىنەدى. بۇگىندە دايىندىق جۇمىستارى جۇرۋدە.
– ءبىرىنشى كەزەكتە ەرىكتى تۇردە مەديتسينا قىزمەتكەرلەرىنە, پەداگوگتەرگە, سوزىلمالى اۋرۋلارمەن اۋىراتىن توپتاعى ادامدارعا سالىنادى. 18 جاسقا دەيىنگى بالالار جانە 65 جاستان اسقان قاريالارعا ەكپە سالىنبايدى. بۇگىندە وبلىس بويىنشا 154 ەگۋ كابينەتى بەلگىلەندى. بۇدان بولەك, شالعاي ەلدى مەكەندە تۇراتىن ازاماتتارعا ۆاكتسينا سالۋ ءۇشىن 64 جىلجىمالى ەگۋ بريگاداسى ۇيىمداستىرىلدى. ۆاكتسينا ءبىر ادامعا ەكى مارتە سالىنادى. ياعني ءبىرىنشى ەكپە قابىلدانعاننان كەيىن 21 كۇننەن كەيىن قايتا ەگىلەدى, - دەدى ءسابيت پازىلوۆ.
– ەگۋ جۇمىستارىنا كوپشىلىكتىڭ ۇركە قارايتىنى تۇسىنىكتى. ويتكەنى, مۇنداي ۆيرۋس بۇرىن بولعان جوق. تاعى ءبىر ەسكەرتە كەتەرىمىز, ۆاكتسينا ەرىكتى تۇردە سالىنادى, – دەدى وبلىس بويىنشا سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى ءاليا ابدىقايىموۆا.