قر پارلامەنتى ءماجىلىسىنىڭ 2 كوميتەتىن پارلامەنتتىك وپپوزيتسيا وكىلى باسقاراتىن بولدى, دەپ حابارلايدى Egemen.kz.
«قر پارلامەنتىنىڭ كوميتەتتەرى مەن كوميسسيالارى تۋرالى زاڭنىڭ 7-بابىنا سايكەس, پالاتا تۇراقتى كوميتەتتەرىنىڭ توراعالارى ءماجىلىس وتىرىسىندا اشىق نەمەسە جاسىرىن داۋىس بەرۋ ارقىلى پالاتا دەپۋتاتتارى جالپى سانىنىڭ داۋىسىمەن سايلانادى», دەدى ءماجىلىستىڭ جالپى وتىرىسىندا پالاتا توراعاسى نۇرلان نىعماتۋلين.
وسى رەتتە دەپۋتات ءاليا ساپاروۆا كوميتەت توراعالارىن اشىق داۋىس بەرۋدى ۇسىنىپ, قولداۋ تاپتى. «پارلامەنتتىك وپپوزيتسيا ماسەلەلەرى بويىنشا قابىلدانعان زاڭناماعا سايكەس, ءماجىلىستىڭ كەم دەگەندە ءبىر تۇراقتى كوميتەتىنىڭ توراعاسى پارلامەنتتىك وپپوزيتسيادان سايلانادى.
سونىمەن قاتار پارلامەنتتىك وپپوزيتسيا باسقا دا تۇراقتى كوميتەتتەردىڭ توراعالارى لاۋازىمىنا كانديدات ۇسىنا الادى. بۇگىنگى جالپى وتىرىسقا دەيىن پارلامەنتتىك كوپشىلىك جانە پارلامەنتتىك وپپوزيتسياعا كىرەتىن پارتيالار فراكتسيالارىنىڭ باسشىلارىنىڭ ءتيىستى كەڭەستەر ءوتتى.
كەڭەس بارىسىندا كەلىسىلگەن شەشىمگە سايكەس, ءماجىلىستىڭ 2 كوميتەتى - اگرارلىق ماسەلەلەر مەن ەكولوگيا ماسەلەلەرى جانە تابيعاتتى پايدالانۋ كوميتەتتەرىنىڭ توراعالارى پارلامەنتتىك وپپوزيتسيادان ۇسىنىلادى. ال قالعان 5 كوميتەت توراعالارى پارلامەنتتىك كوپشىلىكتەن, ياعني «Nur Otan» پارتياسى فراكتسياسىنان سايلانادى», - دەدى ءماجىلىس توراعاسى.