مينيستر زەينەتاقى كولەمى ناقتى قانشا بولعانىن ايتتى

مينيسترلىكتىڭ مالىمەتىنشە, 2020 جىلدىڭ قاڭتار-جەلتوقسان ايلارىندا رەسپۋبليكالىق بيۋدجەتتەن بازالىق زەينەتاقىعا 772,3 ميلليارد تەڭگە جانە ىنتىماقتى زەينەتاقىعا 1 721,5 ميلليارد تەڭگە تولەندى.

«2021 جىلدىڭ 1 قاڭتارىنداعى جاعداي بويىنشا زەينەتكەرلەر سانى - 2 ميلليون 247 مىڭ ادام. ال زەينەتاقى تولەمدەرىنىڭ ورتاشا مولشەرى - (بازالىق زەينەتاقى تولەمىن ەسكەرە وتىرىپ) 94 733 تەڭگە», دەلىنگەن حابارلامادا.

ەسكە سالايىق, 2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى, ونىڭ زەينەتاقى جۇيەسىنە قاتىسۋ ءوتىلىن ەسكەرە وتىرىپ, ءار الۋشىعا جەكە تاعايىندالادى.

«بۇل رەتتە 1998 جىلعى 1 قاڭتارداعى جاعداي بويىنشا ىنتىماقتى جۇيەدە جۇمىس ىستەگەن ۋاقىتى, سونداي-اق مىندەتتى زەينەتاقى جارنالارى تولەنگەن كەزەڭدەر (بۇدان ءارى - مزج) زەينەتاقى جۇيەسىندەگى ەڭبەك وتىلىنە قوسىلادى. سونىمەن, ەگەر زەينەتاقى جۇيەسىندەگى جۇمىس ءوتىلى 10 جىل نەمەسە ودان از بولسا, سونداي-اق ەگەر مۇلدە جوق بولسا, بازالىق زەينەتاقى - ەڭ تومەنگى كۇنكورىس دەڭگەيىنىڭ 54 پايىزى, سودان كەيىن 10 جىلدان اسقان ءار جىل ءۇشىن ونىڭ مولشەرى 2 پايىزعا ارتادى. مىسالى, ەگەر قاتىسۋ ءوتىلى 20 جىل بولسا, بازالىق زەينەتاقى ەڭ تومەن كۇنكورىس دەڭگەيىنىڭ 74 پايىزىن, 30 جىل – ەڭ تومەن كۇنكورىس دەڭگەيىنىڭ 94 پايىزى. جۇمىس ءوتىلى 33 جانە ودان دا كوپ جىل بولسا, ەڭ تومەن كۇنكورىس دەڭگەيىنىڭ 100 پايىزى مولشەرىندە بەلگىلەنەدى», دەپ ءتۇسىندىردى مينيسترلىك وكىلدەرى.