قارجى پيراميداسىن قۇرىپ, وزىنە سەنگەن جۇرتقا جەر سيپاتىپ كەتىپ جۇرگەن الاياقتاردىڭ قىلمىسىن اشكەرەلەۋ كوبىنە قيىنعا ءتۇسىپ جاتادى. قىزىلوردا قالالىق پوليتسيا باسقارماسىنىڭ تەرگەۋشىسى نۇربول نۇرماعانبەت وسىنداي الپىس ايلالى الاياقتىڭ ءبىرىنىڭ كىناسىن دالەلدەپ سوتقا جولداعان ەدى. ءىس بويىنشا 1982 جىلى تۋعان, بۇرىن سوتتى بولعان ايەلدىڭ قارجى پيراميداسىن قۇرۋ ارقىلى 152 ازاماتتىڭ 91 ميلليون 496 مىڭ تەڭگەدەن استام قارجىسىن قولدى ەتكەنى انىقتالعان, دەپ حابارلايدى Egemen.kz.
وقيعا 2019 جىلدىڭ تامىز ايىنان باستاۋ الىپتى. الاياق «WhatsApp» جەلىسىندە «اي-شۋاق» توبىن اشىپ, قارجىلىق پيراميدا قۇرىپ, وعان باسشىلىق جاساعان. توپقا قوسىلعان ءبىرىنشى قاتىسۋشىلار العاشقى سالىمدارىن سالىپ, 40 پايىز ۇستەمەسىمەن ءوز قاراجاتتارىن قايتارىپ الىپ وتىرعانى بەلگىلى بولدى. جالپى اينالىمداعى قارجى 1 ملرد 695 ملن 538 مىڭ تەڭگەنى قۇراعان. الاياق كەيىننەن قوسىلعان پيراميدا قاتىسۋشىلارىنا قۇر ۋادەنى ءۇيىپ-توگىپ, كوزدەن تاسا بولعان.
وسى اتالعان دەرەك بويىنشا قازاقستان رەسپۋبليكاسىنىڭ قىلمىستىق كودەكسىنىڭ 217-بابىنىڭ 3-بولىگىنىڭ 2-تارماعىمەن سوتقا دەيىنگى تەرگەپ-تەكسەرۋ امالدارى جۇرگىزىلدى. قىزىلوردا قالالىق سوتىنىڭ شەشىمىمەن ايىپتالۋشى 5 جىلعا باس بوستاندىعىنان ايىرىلدى.