ورتالىق سايلاۋ كوميسسياسى (وسك) حالىقارالىق ۇيىمدار مەن شەت مەملەكەتتەردىڭ بايقاۋشىلارىن اككرەديتتەۋدى اياقتادى.
10 قاڭتارعا تاعايىندالعان كەزەكتى پارلامەنت ءماجىلىسى جانە ءماسليحاتتار دەپۋتاتتارىنىڭ سايلاۋىنا حالىقارالىق ۇيىمدار مەن شەت مەملەكەتتەردىڭ بايقاۋشىلارىن اككرەديتتەۋ ماسەلەسى بويىنشا وسك وتىرىسى ءوتتى.
كۇن تارتىبىندەگى ماسەلە بويىنشا ورتالىق سايلاۋ كوميسسياسىنىڭ مۇشەسى اناستاسيا ششەگورتسوۆا بايانداما جاسادى. ول 2020 جىلعى 29 جەلتوقسان مەن 2021 جىلعى 4 قاڭتار ارالىعىنداعى كەزەڭدە ورتالىق سايلاۋ كوميسسياسىنا سىرتقى ىستەر مينيسترلىگىنەن اككرەديتتەۋگە قوسىمشا 4 حالىقارالىق ۇيىم مەن 7 شەت مەملەكەتتەن 24 بايقاۋشىنىڭ كانديداتۋراسى ۇسىنىلعانىن حابارلادى.
وتىرىستا وسك توراعاسى بەرىك يماشەۆ حالىقارالىق ۇيىمدار مەن شەت مەملەكەتتەردىڭ بايقاۋشىلارىن اككرەديتتەۋ تۋرالى ماسەلە كوميسسيانىڭ 7 وتىرىسىندا قارالعانىن اتاپ ءوتتى. سايلاۋ تۋرالى زاڭعا سايكەس شەت مەملەكەتتەر مەن حالىقارالىق ۇيىمداردىڭ بايقاۋشىلارىن اككرەديتتەۋ داۋىس بەرۋ كۇنىنە بەس كۇن قالعاندا جەرگىلىكتى ۋاقىت بويىنشا ساعات 18.00-دە, ياعني 4 قاڭتار ساعات 18.00-دە اياقتالدى. وسىلايشا, شەت مەملەكەتتەر مەن حالىقارالىق ۇيىمداردىڭ بايقاۋشىلارىن اككرەديتتەۋ قورىتىندىلارى بويىنشا قازاقستان رەسپۋبليكاسى پارلامەنتى ءماجىلىسى مەن ءماسليحاتتارى دەپۋتاتتارىنىڭ كەزەكتى سايلاۋىنا بارلىعى 398 بايقاۋشى اككرەديتتەلدى, ونىڭ ىشىندە 10 حالىقارالىق ۇيىمنان – 322 بايقاۋشى بار: تمد پارلامەنتارالىق اسسامبلەياسى – 48, تمد اتقارۋشى كوميتەتى – 179, يسلام ىنتىماقتاستىق ۇيىمى – 4, ەقىۇ-نىڭ دەموكراتيالىق ينستيتۋتتار جانە ادام قۇقىقتارى جونىندەگى بيۋروسى – 42, ەقىۇ پارلامەنتتىك اسسامبلەياسى – 9, شانحاي ىنتىماقتاستىق ۇيىمى – 15, تۇركىتىلدەس مەملەكەتتەردىڭ ىنتىماقتاستىق كەڭەسى – 7, ۇجىمدىق قاۋىپسىزدىك تۋرالى شارت ۇيىمىنىڭ پارلامەنتتىك اسسامبلەياسى – 7, تۇركىتىلدەس ەلدەردىڭ پارلامەنتتىك اسسامبلەياسى – 9, ەو-نىڭ قازاقستانداعى وكىلدىگى – 2. ال 31 شەت مەملەكەتتەن 76 بايقاۋشى تىركەلدى: يوردانيا, قىرعىزستان, مالديۆ, مولدوۆا, تۇركيا, ازەربايجان, ارمەنيا, يندونەزيا, وزبەكستان, رەسەي, رۋمىنيا, ءۇندىستان, فيليپپين, ماجارستان, يسپانيا, نورۆەگيا, فرانتسيا, شۆەيتساريا, پولشا, چەحيا, يتاليا, ەستونيا, ۋكراينا, گەرمانيا, بەلگيا, پالەستينا, ۇلىبريتانيا, موڭعوليا, شۆەتسيا, كانادا, فينليانديا.